امریکا اور بھارت کے درمیان مواصلات اور سیکیورٹی معاہدوں پر دستخط

نئی دہلی :بھارت اور امریکا کے درمیان مواصلات اور سیکیورٹی کے معاہدوں سمیت افغان امن عمل اور دہشتگردی میں تعاون بڑھانے پر اتفاق ہوا ہے۔
نئی دلی میں امریکی اور بھارتی وفود کی سطح پر ہونے والی ملاقات کےمشترکہ اعلامیہ کے مطابق دونوں ممالک کے درمیان علاقائی و عالمی مسائل کے حل کے لیے ہر پلیٹ فارم استعمال کرنے کا اعادہ کیا گیا ہےجبکہ بھارت اور امریکا نے امن، خوشحالی اور سیکیورٹی کی عالمی کوششوں کی سربراہی جاری رکھنے کے عہد کیا ہے۔

دونوں ملکوں کے وزرائے خارجہ اور وزرائے دفاع کے درمیان محفوظ کمیونیکیشن قائم کرنے کا فیصلہ بھی ہوا ہے۔اعلامیے کے مطابق امریکا نے بطور اہم دفاعی شراکت دار بھارت کی اسٹریٹجک اہمیت کا اعتراف کیا اور دونوں ممالک کے درمیان دفاعی سازو سامان کی تجارت اور پیداواری رابطوں میں توسیع کا فیصلہ بھی ہوا۔
دونوں ملکوں نے انسداد دہشت گردی تعاون میں توسیع اور معلومات کے تبادلے میں اضافے کا فیصلہ بھی کیا ہے۔
بھارت اور امریکا کے درمیان سول ایٹمی توانائی پارٹنرشپ کے مکمل اطلاق پر رضامندی بھی ظاہر کی گئی ہے اور دونوں ممالک کے درمیان اگلی ٹو پلس ٹو ملاقات 2019 میں امریکا میں ہونے پر بھی اتفاق کیا ہے۔
دونوں ممالک کے درمیان دفاعی صنعتی سیکیورٹی پر مذاکرات شروع کرنے پر بھی رضامندی ظاہر کی گئی اور نئی جنگی مشقوں کے ساتھ فوجیوں کے تبادلوں کا فیصلہ بھی کیا گیا۔
اعلامیے میں کہا گیا ہے کہ متحد، خودمختار، جمہوری، مستحکم اور خوشحال و پُرامن افغانستان کے لیے پُرعزم ہیں۔
اعلامیے کے مطابق بھارت اور امریکا کے درمیان سمندری سیکیورٹی اور بحری علاقائی سالمیت میں توسیع کا اعادہ کیا گیا، مغربی بحرہ ہند میں دونوں ملکوں کے درمیان بحری جنگی تعاون بڑھانے کا فیصلہ بھی ہوا۔
بھارت اور امریکا نے اقوام متحدہ اور ایف اے ٹی ایف جیسے بین الاقوامی فورمز پر دو طرفہ تعاون جاری رکھنے کے عزم کا اعادہ کیا ہے۔
بھارتی وزیر خارجہ سشما سوراج کا کہنا ہے کہ بھارت کے این ایس جی گروپ میں شمولیت پر مل کر کام کرنے پر اتفاق ہوا ہے۔
ان کا کہنا تھا کہ ہم دہشتگردی کے خلاف جنگ میں مل کر کام کر رہے ہیں اور افغانستان کے لیے امریکی صدر کی پالیسی کا خیر مقدم کرتے ہیں۔
بھارت کی وزیر دفاع نرملا ستھا رامن کا کہنا تھا کہ ملاقات میں امن، ترقی کے لیے تعاون کا اعادہ کیا گیا۔
انہوں نے کہا کہ امریکا اور بھارت سیکیورٹی چیلنجز، دہشتگری کے خلاف جنگ میں تعاون کریں گے۔
بھارتی وزیر دفاع کا کہنا تھا کہ کمیونیکیشن اور سیکیورٹی معاہدے پر دستخط سے نئی دلی کو امریکا کی جدید ٹیکنالوجی تک رسائی ملے گی۔