سندھ بھر کے 74 جعلی اخبارات کی رجسٹریشن منسوخ

کراچی: محکمہ اطلاعات سندھ میں رجسٹرڈ 74 جعلی اخبارات کی رجسٹریشن کی منسوخی کے احکامات جاری کردیئے گئے۔نجی ٹی وی کے مطابق سندھ بھرمیں 74 جعلی اخبارات کی رجسٹریشن کی منسوخ کردی گئی، مذکورہ اخبارات کی ڈکلیئریشن منسوخی کے احکامات بھی جاری کئے گئے ہیں ۔ محکمہ اطلاعات سندھ نے اس ضمن میں متعلقہ ڈپٹی کمشنرز کو خطوط ارسال کردیئے ۔

ذرائع کےمطابق محکمہ اطلاعات نے سندھ بھر کے اخبارات کی جانچ پڑتال، ملازمین اور ان کے دفاتر سے متعلق انکوائری کمیٹی بنائی تھی، انکوائری کمیٹی کی رپورٹ کی روشنی میں مذکورہ 74 اخبارات کے متعلق اہم فیصلہ کیا گیا، کمیٹی کی رپورٹ کے مطابق مذکورہ اخبارات کے دفاتراور نہ ملازمین کا کوئی وجود تھا۔ مذکورہ اخبارات کی منسوخی سے محکمے کو سالانہ لاکھوں روپے اشتہارات کی مد میں بچت ہوگی۔سیکریٹری محکمہ اطلاعات سندھ عبدالرشید سولنگی نے بھی اخبارات کی منسوخی کی تصدیق کرتے ہوئے بتایا ہے کہ جعلی روزناموں، ہفتہ وار، ماہانہ اخبارات و رسائل کو مرحلہ وار منسوخ کریں گے۔