سعودی عرب کی جانب سےپاکستان کوایک ارب ڈالرکی رقم موصول

کراچی: سعودی عرب کی جانب سے پاکستان کو مالی مشکلات سے نکالنے کے لیے پیکیج کا آغاز ہوگیا،سعودی عرب کی جانب سے ایک ارب ڈالر کی رقم پاکستان کو موصول ہوگئی۔
اطلاعات کے مطابق سعودی عرب نے وزیر اعظم عمران خان کے دورہ سعودی عرب کے دوران اپنے کیے گئے اعلان پر عمل درآمد کرتے ہوئے حکومت پاکستان کے اکاؤنٹ میں ایک ارب ڈالر منتقل کردیے جب کہ مزید دو ارب ڈالر کی رقم جلد منتقل کی جائے گی۔
اسٹیٹ بینک آف پاکستان نے رقم موصول ہونے کی تصدیق کرتے ہوئے کہا ہے کہ رقم ملنے کے بعد پاکستان کے زرمبادلہ کے ذخائر مزید مستحکم ہوگئے اور یہ ذخائر بڑھ کر 14.8 ارب ڈالر ہوگئے ہیں۔
یاد رہے کہ سعودی عرب نے پاکستان کو مالی مشکلات سے نکالنے کے لیے 12 ارب ڈالر کے اقتصادی پیکیج کا اعلان کیا ہے جس میں تین سال تک تین تین ارب ڈالر کا تیل دیا جائے گا جب کہ بیرونی ادائیگیوں کے لیے سعودی عرب نے تین ارب ڈالر کی رقم پاکستان کے اکاؤنٹ میں منتقل کرنے کا اعلان کیا تھا۔