پی ایس ایل فور کا رنگا رنگ میلہ دبئی میں سج گیا

پاکستان سپر لیگ (پی ایس ایل) فور کی افتتاحی تقریب کا انعقاد دبئی انٹرنیشنل کرکٹ اسٹیڈیم میں کیا گیا جس میں عالمی شہرت یافتہ ملکی  فنکاروں نے اپنے فن کا شاندار مظاہرہ کیا۔

چھکے، چوکے اور وکٹیں گرتے دیکھنے کیلیے بے تاب شائقین کرکٹ کا انتظارختم ہوا، پاکستان سپر لیگ کے چوتھے ایڈیشن کا آغاز دبئی انٹرنیشنل کرکٹ اسٹیڈیم میں ہوگیا۔

پی ایس ایل 4 کی افتتاحی تقریب پاکستانی وقت کے مطابق آج 8 بجکر 45 منٹ پر دبئی میں شروع ہوئی جس میں عوام کی بڑی تعداد سمیت سابق صدر جنرل ریٹائرڈ پرویز مشرف اور دبئی کے اعلیٰ حکام نے بھی شرکت کی.

فواد خان نے ٹائٹل گانا گا کرشائقین کو خوب گرمایا، انگلش سنگر پِٹ بُل نے طیارے کی فنی خرابی کے باعث عدم شرکت پر معذرت کر لی تھی۔

مارچنگ بینڈ نے فائنل کاؤنٹ ڈاون کی دھن بجائی،پاکستان سپر لیگ فور میں 6 ٹیمیں حصہ لے رہی ہیں،افتتاحی میچ میں لاہورقلندرز اور دفاعی چیمپئن اسلام آباد یونائیٹڈ مد مقابل ہوں گی۔

اسٹیڈیم کے ہر حصے میں تماشائیوں کے موبائل فونز کی لائٹیس نے ایک خوبصورت منظر پیش کیا۔

افتتاحی تقریب میں لیزر کی AR اور VR ٹیکنالوجی استعمال کی گئی جس میں دیکھنے والوں کو کسی چیز کے اپنے سامنے ہونے کا گمان ہوتا ہے۔

متحدہ عرب امارات کے وزیر شیخ نہیان بن مبارک النہیان نے تقریر کی،اپنی تقریر میں ان کا کہنا تھا کہ وہ پی ایس ایل میں شام تمام ٹیموں کو خوش آمدید کہتے ہیں۔

اس خطاب کے بعد معروف بینڈ بونیم کی گلوکارہ مارشیابیرٹ نے شاندار پرفارمنس کا مظاہرہ کیا اور ماضی کا سپر ہٹ گانا ‘ڈیڈی کول’ پیش کیا۔

ان کے بعد پاکستانی گلوکارہ عائمہ بیگ نے اپنی شاندار پرفارمنس پیش کرتے ہوئے لیجنڈ گلوکارہ نازیہ حسن کا مقبول گانا ‘ڈسکو دیوانے‘ پیش کیا جبکہ ان کے ہمراہ گلوکار شجاع حیدر بھی موجود تھے۔

جنون گروپ نے اپنا مشہور زمانہ ’اے جذبہ جنون‘ گا کر شائقین کے دلوں کو گرمایا اور خوب داد وصول کی۔

فواد خان نے پی ایس ایل کا تھیم سانگ ’چل جوش دکھا دے تو‘ گایا جب کہ آئمہ بیگ نے بھی اسٹیج پر پرفارم کیا۔

تقریب میں پرفارم کرنے والے امریکی فنکار پٹ بل نے شرکت سے معذرت کرتے ہوئے اپنے ویڈیو پیغام میں کہا کہ وہ طیارے میں فنی خرابی کے باعث رنگا رنگ تقریب کا حصہ نہیں بن سکیں گے۔

چیئر مین پی سی بی احسان مانی نے افتتاحی تقریب سے خطاب کرتے ہوئے کہا کہ پاکستان سپر لیگ دنیا کی بڑی لیگ ہے۔

 

چیئر مین پی سی بی نے کہا کہ پاکستان سمیت دنیا بھر سے آنے والے شائقین کو خوش آمدید کہتا ہوں
ایونٹ منعقد کرانے پر یو اے ای حکومت کے شکر گزار ہیں۔

احسان مانی کا کہنا تھا کہ پاکستان سپر لیگ دنیا کی بڑی لیگ ہے، پاکستان سمیت دنیا بھر سے آنے والے شائقین کو خوش آمدید کہتا ہوں۔

چیئرمین پی سی بی نے ٹورنامنٹ میں شریک تمام ٹیموں کی جیت کے لیے نیک تمناؤں کا اظہار بھی کیا۔

تقریب کے بعد ایونٹ کے افتتاحی میچ میں دفاعی چیمپئن اسلام آباد یونائیٹڈ اور لاہور قلندرز کی ٹیمیں مدمقابل ہوں گی۔

اسلام آباد یونائیٹڈ کی قیادت کے فرائض اس بار محمد سمیع کو سونپے گئے ہیں جب کہ اسکواڈ میں لیوک رونچی، حسین طلعت، فہیم اشرف، آصف علی، این بیل، فلپ سالٹ، صاحبزادہ فرحان، رومان رئیس، سمٹ پٹیل، شاداب خان، کیمرون ڈیلپورٹ، ظفر گوہر، وقاص مقصود، موسیٰ خان، ناصر نواز شامل ہیں۔

لاہور قلندرز کی قیادت محمد حفیظ کریں گے، جن کے پاس اے بی ڈویلیئرز، فخر زمان، کارلوس بریتھ ویٹ، کوری اینڈرسن، حارث سہیل، حسن علی، شاہین شاہ آفریدی، یاسر شاہ، اینٹون ڈیوچ، راحت علی، سندیپ لیمیچن، آغا سلمان، سہیل اختر، عمیر مقصود اور محمد عمران جیسے کرکٹر ہیں۔

یونٹ میں شامل تمام ٹیموں کے کھلاڑی دبئی پہنچ گئے، گزشتہ روز ملتان سلطانز کے شاہد آفریدی اور کوئٹہ گلیڈی ایٹرز کے ریلے روسو دبئی پہنچے۔

آسٹریلوی لیگ اسپنر فواد احمد بھی دبئی پہنچنے والوں میں شامل ہیں، اسی طرح کراچی کنگز کے کولن انگرام نے بھی دبئی پہنچ کر ٹیم کو جوائن کرلیا۔

یاد رہے کہ پی ایس ایل کے چوتھے ایڈیشن میں مجموعی طور پر 34 میچز کھیلیں جائیں گے اور فائنل سمیت آخری 8 میچز پاکستان میں ہوں گی۔

متحدہ عرب امارات کے تین شہر دبئی، ابوظہبی اور شارجہ 26 میچز کی میزبانی کریں گے جب کہ فائنل سمیت 5 میچز کراچی کے نیشنل اسٹیڈیم اور 3 میچز لاہور کے قذافی اسٹیڈیم میں ہوں گے۔