کراچی کنگز کو جیت کے لیے 119 رنز کا ہدف

پی ایس ایل سیزن فور کے 24 ویں میچ  میں ملتان نے پہلے بیٹنگ کرتے ہوئے کراچی کنگز کو جیت کے لیے 119 رنز کا ہدف دیا ہے۔

ابوظہبی کے انٹرنیشنل کرکٹ اسٹیڈیم میں کھیلے جا رہے میچ میں کراچی کنگز کے کپتان عماد وسیم نے ٹاس جیت کر ملتان سلطانز کو پہلے بیٹنگ کی دعوت دی۔

ملتان سلطانز کی جانب سے جیمز ونس اور عمر صدیق نے اننگز کا آغاز کیا لیکن عمر صدیق دوسرے ہی اوور میں عثمان شنواری کی گیند پر بولڈ ہو گئے۔

چارلس بھی چوتھے اوور میں 7 رنز بنا کر آؤٹ ہو گئے جب کہ شعیب ملک 26 رنز بنا کر عمر خان کا نشانہ بنے۔

حماد اعظم نے 29 رنز کی اننگز کھیلی جب کہ گرین نے 18 اور جیمز ونس نے 16 رنز جوڑے۔

مقررہ 20 اوورز میں ملتان سلطانز کی ٹیم 7 وکٹوں کے نقصان پر 118 رنز بنا سکی۔

کراچی کنگز محمد عامر والدہ کی طبیعت خراب ہونے کے باعث میچ نہیں کھیل رہے ان کی جگہ عثمان شنواری کو ٹیم میں شامل کیا گیا ہے۔

کراچی کنگز سات میچ کھیل کر 6پوائنٹس کے ساتھ پانچویں نمبر پر ہے جبکہ ملتان سلطانز آٹھ میچ کھیل کر 4پوائنٹس کے ساتھ چھٹی پوزیشن پر ہے۔