مزار اقبال پر گارڈز کی تبدیلی کی پروقار تقریب

یوم پاکستان کے سلسلے میں مزار اقبال پر گارڈز کی تبدیلی کی پروقار تقریب ہوئی۔ پاک فضائیہ کے چاق و چوبند دستے نے گارڈز کے فرائض سنبھال لیے۔

نجی ٹی وی کے مطابق ملک بھر میں آج یوم پاکستان ملی جوش وجذبے کے ساتھ منایا جا رہا ہے یوم پاکستان کے موقع پر گارڈز کی تبدیلی کی پروقار تقریب ہوئی۔

تقریب کے مہمان خصوصی پاک فضائیہ کے ایئرکموڈور رضوان ملک نے مزار اقبال پر پریڈ کا معائنہ کیا۔ پاک فضائیہ اور پنجاب رینجرز کے چاق وچوبند دستے نے مزارا قبال پر سلامی دی۔

پاک فضائیہ کے چاق وچوبند دستے نے مزار اقبال پر گارڈز کی ذمہ داری سنبھال لی۔ اس سے قبل رینجرزکا دستہ مزارپر گارڈزکے فرائض سرانجام دے رہا تھا۔

واضح رہے کہ ملک بھرمیں یوم پاکستان ملی جوش و جذبے سے منایا جا رہا ہے، اسلام آباد میں دن کا آغاز اکتیس اور صوبائی دارالحکومتوں میں اکیس، اکیس توپوں کی سلامی سے ہوا۔

توپوں کی سلامی کے موقع پر پاک فوج کے جوانوں کی جانب سے ’نعرہ تکبیر‘ اور ’پاکستان زندہ باد‘ کے فلک شگاف نعرے لگائے گئے۔