ایرانی دھمکیاں۔امریکا نے بی-52 بمبار طیارے قطر پہنچادیے

امریکا نے ایرانی دھمکیوں کے بعد اپنا بی-52 بمبار طیارہ قطر میں واقع اپنے فوجی کیمپ میں پہنچا دیا۔

بین الاقوامی خبر رساں ادارے کے مطابق’وائٹ ہاؤس‘ کے حکم پرایرانی دھمکیوں کے پیش نظر بمبار طیارہ قطر میں امریکی فوجی کیمپ میں پہنچادیا گیا ہے۔ طیارے ایک سے زائد ہیں تاہم طیاروں کی تعداد ظاہر نہیں کی گئی۔

امریکی فضائیہ کی جانب سے جاری کی گئی تصویر میں ایک بی-52 ایچ اسٹریٹوفورٹریس طیارے کو العودید ایئربیس پراترتے ہوئے دکھایا گیا ہے جب کہ دیگر طیارے خفیہ مقامات پراتارے گئے ہیں۔

چند روز قبل ہی امریکا نے ایران کی غیر معمولی دھمکیوں کے بعد ’ابراہام لنکن ایئرکرافٹ کیریر اسٹرائیک گروپ‘ قطر بھیجنے کا اعلان کیا تھا تاکہ ایران کی ممکنہ جنگی کارروائی کا مقابلہ کیا جاسکے۔

واضح رہے کہ بدھ کے روزایران نے عالمی قوتوں کے ساتھ کیے گئے جوہری توانائی 2015 کی بعض شقوں سے دستبردار ہونے کا اعلان کرتے ہوئے جوہری توانائی کو ایٹمی مقاصد کے لیے استعمال کرنے میں آزاد ہونے کا عندیہ دیا تھا۔