کابل میں یکے بعد دیگرے3بم دھماکے۔19 افراد ہلاک،50زخمی

افغانستان کے دارالحکومت کابل میں یکے بعد دیگرے ہونے والے تین بم دھماکوں کے نتیجے میں کم سے کم 19 افراد ہلاک اور50 سے زائد زخمی ہوگئے۔

پہلا دھماکا صبح کے وقت کابل کے علاقے ماکرورایانِ کوہنا میں ہوا جب وزارت مائنز اینڈ پیٹرولیم کے ملازمین کو لے جانے والی بس میں نصب بم زور دار دھماکے سے پھٹ گیا۔ اس دھماکے کے نتیجے میں 12 افراد ہلاک،27زخمی ہوئے جن میں 5 خواتین اور ایک بچہ بھی شامل ہے۔

افغان وزارت داخلہ کے ترجمان نصرت رحیمی کے مطابق بس میں دھماکا ہونے کے فوراً بعد اسی علاقے میں ایک موٹر سائیکل سوار خود کش بمبار نے خود کو دھماکے سے اڑا لیا، اس دھماکے کے نتیجے میں 7 افراد ہلاک اور 20 زخمی ہوئے۔

انہوں نے بتایا کہ تیسرا دھماکا کابل کے علاقے پی ڈی 9 میں ایک کار میں ہوا۔ اس حملے کی ذمہ داری طالبان نے قبول کی اور کہا کہ انہوں نے غیرملکی فوجیوں کو نشانہ بنایا جس میں غیر ملکی افواج کے 9 اہلکار ہلاک ہوئے اور دو گاڑیاں تباہ ہوئیں تاہم اس دعوے کی حکومت نے تصدیق نہیں کی۔