چین کی فیکٹری میں خوفناک آتشزدگی، 19 ملازمین ہلاک

چین کی فیکٹری میں لگنے والی ہولناک آگ میں جھلس کر 19 ملازمین ہلاک اور متعدد زخمی ہوگئے۔

بین الاقوامی خبر رساں ادارے کے مطابق چین کے مشرقی صوبے کے تجارتی شہر ننگھائی کاؤنٹی میں واقع ایک فیکٹری میں اچانک خوفناک آگ بھڑک اُٹھی جس نے دیکھتے ہی دیکھتے پوری فیکٹری کو اپنی لپیٹ میں لے لیا۔

ریسکیو ادارے نے امدادی کاموں کا آغاز کرتے ہوئے 8 ملازمین کو بحفاظت نکال لیا، 3 زخمیوں کو قریبی اسپتال منتقل کیا گیا ہے جن میں سے ایک کی حالت نازک بتائی جارہی ہے جب کہ 19 ملازمین بری طرح جھلس کرہلاک ہوگئے۔

فیکٹری میں لگنے والی آگ کا دھواں آسمان کو چھونے لگا، آس پاس کی عمارتوں کو حفاظتی اقدام کے تحت خالی کرالیا گیا، حادثے کی تحقیقات کے لیے انکوائری کمیٹی تشکیل دے دی گئی ہے۔

واضح رہے کہ چین کے صنعتی ایریا میں حفاظتی اقدامات نہ ہونے کے برابر ہیں جس کے باعث حادثات عام ہیں صرف گزشتہ 6 ماہ میں انسانی ضیاع کا یہ پانچواں بڑا واقعہ ہے جن میں مجموعی طورپر119 افراد ہلاک اور600 سے زائد زخمی ہوئے۔