ریاست ڈنڈے سے عوام کے حقوق کا تحفط کرے گی۔فردوس عاشق اعوان

جمعرات 17 اکتوبر 2019, 11:27 صبح اہم خبریں, قومی

وزیراعظم عمران خان کی معاون خصوصی برائے اطلاعات فردوس عاشق اعوان کا کہنا ہے ریاست کو حق ہے کہ وہ ڈنڈا اٹھائے اورعوام کے جان و مال کا تحفظ کرے۔

نجی ٹی کے مارننگ شو میں گفتگو کرتے ہوئے فردوس عاشق اعوان کا کہنا تھا کہ احتجاج سیاسی جماعتوں کا آئینی اور قانونی حق ہے لیکن 27 اکتوبر کشمیریوں سے یکجہتی کا دن ہے۔

مولانا فضل الرحمن کی جانب سے حکومت کو گھر بھیجنے سے متعلق بیان پر ردعمل دیتے ہوئے فردوس عاشق اعوان نے کہا کہ مولانا اور دیگر سیاسی جماعتوں کے حکومت کو گھر بھیجنے کے ارمان دیوانے کی بڑھکیں ہیں۔

معاون خصوصی نے کہا کہ مولانا فضل الرحمن کے بیانیے کی حوصلہ شکنی ہو گی اور قوم کی یکجہتی کو پارا پارا کرنے کی سازش کو حکومت برداشت نہیں کرے گی۔

ان کا کہنا تھا کہ سیاسی پنجہ آزمائی کا حل بھی سیاسی ہی ہوتا ہے جب کہ احتجاج سے متعلق عدالت نے بال انتظامیہ کے کورٹ میں ڈال دی ہے۔

فردوس عاشق اعوان نے کہا کہ ریاست کو حق ہے کہ وہ ڈنڈا اٹھائے اورعوام کے جان و مال کا تحفظ کرے۔