مسجد نبوی کے احاطے میں آب زمزم کی سبیل بنانے کا اعلان

مسجد الحرام اور مسجد نبوی انتظامیہ کے سربراہ اعلیٰ شیخ ڈاکٹرعبدالرحمن السدیس نے اعلان کیا ہے کہ مسجد نبوی کے جنوب مغربی صحن میں آب زمزم کی سبیل قائم کی جائے گی۔

غیرملکی خبررساں ادارے کے مطابق دنیا بھر سے سعودی عرب آنے والے زائرین مملکت پہنچنے کے بعد آب زمزم پینے کے خواہشمند ہوتے ہیں۔سعودی حکومت نے مسجد الحرام مکہ مکرمہ میں جگہ جگہ آب زمزم کی سبیلیں قائم کررکھی ہیں۔

ڈاکٹر السدیس نے کہا کہ مسجد نبوی کے جنوبی صحن میں آب زمزم کی سبیل قائم کرنے کی تیاریاں ہوگئیں، یہ کام انتظامیہ کے ماتحت ا نجینئرز، تکنیکی امور کے ماہرین اور دیگر کارکن انجام دیں گے۔

معاون سیکریٹری سربراہ انتظامیہ انجینئر فیصل بن محمد الجہنی نے بتایا کہ آب زمزم کی سبیل 330 مربع میٹر کے رقبے پر قائم کی جائے گی۔

اس کا مقصد مسجد نبوی کے زائرین کو 24گھنٹے آب زمزم کی نعمت سے فیض یاب کرنا ہے۔ انہوں نے بتایا کہ آب زمزم کی نئی سبیل میں جدید ٹیکنالوجی سے فائدہ اٹھایا جائے گا، پانی کی حفاظت اور سلامتی کو یقینی بنانے کے لیے تمام تدابیر سائینٹفک بنیادوں پر کی جائیں گی۔