امریکا۔اسکول میں فائرنگ سے دو طلبہ ہلاک،3 زخمی

امریکی ریاست کیلیفورنیا میں ایک  نوجوان نے اپنی سالگرہ کے روزاسکول میں فائرنگ کردی جس کے نتیجے میں 2 طلبہ ہلاک اور3 زخمی ہوگئے۔

 میڈیا رپورٹس کے مطابق کیلیفورنیا میں شمالی لاس اینجلس میں واقع ایک ہائی اسکول میں فائرنگ کا واقعہ پیش آیا جس کے نتیجے میں 2 طلبہ ہلاک اور3 کے زخمی ہونے کی تصدیق ہوئی ہے۔

برطانوی میڈیا کاکہناہےکہ فائرنگ کے شبے میں ایک 16 سالہ نوجوان کو زخمی حالت میں حراست میں لیا گیا ہے۔

پولیس کے مطابق فائرنگ کا واقعہ مقامی وقت کے مطابق صبح 7 بج کر38 منٹ پر پیش آیا جس کی اطلاع ملنے پر پولیس فوری طورپرجائے وقوعہ پر پہنچی جہاں سے 6 زخمیوں کو اسپتال منتقل کیا گیا جب کہ ان زخمیوں میں سے ہی بعد میں مشتبہ حملہ آورکی شناخت ہوئی۔

پولیس کاکہناہے کہ فائرنگ کے نتیجے میں زخمی ہونے والی 16 سالہ لڑکی اور 14 سالہ لڑکا زخموں کی تاب نہ لاتے ہوئے دوران علاج چل بسے جب کہ دیگر زخمیوں میں دو لڑکیاں اورایک لڑکا شامل ہے۔

پولیس کے مطابق مشتبہ حملہ آورایک 16 سال کا نوجوان ہے جس کی آج سالگرہ تھی جب کہ نوجوان نے فائرنگ کرنے کے بعد خود کو بھی گولی ماری جس سے وہ زخمی ہوگیا۔

پولیس کا بتانا ہےکہ حملہ آورکے قبضے سے ایک آٹومیٹک پستول برآمد کی گئی ہے جس میں کوئی گولی موجود نہیں تھی۔

پولیس نے ملزم کے گھرکی تلاشی لی جہاں سے مزید شواہد اکٹھے کیے گئے۔