سندھ کی بڑی سیاسی شخصیت کا سابق فرنٹ مین ساتھیوں سمیت گرفتار

سہراب گوٹھ پولیس نے ایک بڑی کارروائی کے دوران سندھ کی ایک بڑی سیاسی شخصیت کے سابق فرنٹ مین کو زمینوں پر قبضے کے الزام میں سات ساتھیوں سمیت گرفتارکرلیا۔

سہراب گوٹھ پولیس کے مطابق سہراب گوٹھ کے قریب سپرہائی وے پراراضی پرقبضے کی اطلاع پر سہراب گوٹھ پولیس نے فوری کارروائی کی۔

ملزمان سپرہائی وے پربراق پٹرول پمپ کے قریب پانچ ایکڑاراضی پر قبضہ کر رہے تھے۔سہراب گوٹھ پولیس کے مطابق اطلاع ملنے پر پولیس پہنچی تو ملزمان نے پولیس اہلکاروں پر حملہ کردیا، ملزمان کے تشدد سے ایک پولیس اہلکار کا بازو ٹوٹ گیا، جس پرمزید نفری بلوائی گئی۔

پولیس کے مطابق قبضہ گروپ کے سرغنہ علی حسن بروہی،علی نواز بروہی، اخلاق احمد، سانول، پسومل، شاہنواز اور عبداللہ کو گرفتار کرلیا گیا۔

پولیس ذرائع کے مطابق علی حسن بروہی سابقہ سیاسی شخصیت کا فرنٹ مین رہا ہے جو پہلے بھی گرفتارہوچکا ہے،علی حسن بروہی کراچی سمیت سندھ بھر میں زمینوں پرقبضوں کا بڑا کردار ہے۔

پولیس کے مطابق ملزمان سے بھاری اسلحہ اور دیگر سامان برآمد ہوا، ملزمان کے خلاف مقدمات درج کرلیے گئے ہیں۔