سعودی عرب کا مساجد میں باجماعت نمازکی ادائیگی معطل کرنے کا اعلان

سعودی عرب نے مساجد میں جمعہ اور پنج وقتہ نمازوں کی با جماعت ادائیگی معطل کرنے کا اعلان کردیا لیکن مکہ میں مسجد الحرام اور مدینہ منورہ میں مسجد نبوی میں اس پابندی کا اطلاق نہیں ہوگا۔حرمین شریفین اورمسجد نبوی میں بدستور نمازوں کی ادائیگی کا عمل جاری رہے گا۔

سعودی حکومت نے اس پابندی کو اسلامی شریعت کے اصول کے تحت ایک مذہبی فریضہ قرار دیا ہے۔ علما نے کہا ہے کہ اسلامی شریعت میں لوگوں کو یہ تک ہدایت کی گئی ہے کہ اگران کے مُنہ سے کچھ کھانے کے بعد بُو آرہی ہو تو وہ جماعت کی نماز میں شریک ہونے سے گریزکریں،کسی مہلک وائرس کا شکارہونے کا معاملہ تواس سے بھی بڑا ہے۔سعودی عرب میں ایران سے لوٹنے والے کئی افراد کرونا وائرس سے متاثر پائے گیے ہیں ۔

یادر ہے کہ سعودی عرب میں سینئر اسکالرز کی کونسل نے منگل کو فیصلہ کیا کہ مملکت کی تمام مساجد میں روزانہ باجماعت نمازاور جمعہ کی نمازکو بھی معطل کیا جائے۔ مکہ مکرمہ میں مسجد الحرام اور مدینہ میں مسجد نبوی کو اس حکم سے استثنیٰ قراردیاگیاہے۔

سعودی پریس ایجنسی نے کونسل کے ایک بیان کے حوالے سے رپوٹ کیا ہے کہ یہ فیصلہ مملکت کی جانب سے کرونا وائرس کے پھیلاؤ کو روکنے کے لیے کیے جانے والے حفاظتی اوراحتیاطی اقدامات کا ایک حصہ ہے۔بیان میں کہا گیا ہے کہ ریاض میں منعقدہ کونسل کے 25 ویں غیر معمولی اجلاس میں فیصلہ کیا گیا ہے کہ تمام مساجد عارضی بنیادوں پر بند رہیں گی لیکن نماز(اذان) کا اہتمام ہمیشہ کی طرح کیا جائے گا۔