قیامت کے آثار۔کرونا سے مرنے والوں کی تعداد 83 ہزار سے بڑھ گئی

امریکا میں کرونا سے صورتحال تباہ کن ہو گئی ہے، 24 گھنٹوں میں 1939 افراد ہلاک ہو گئے، امریکا میں ہلاکتوں کی تعداد 13 ہزارسے زائد ہو گئی، امریکی صدر نے عالمی ادارہ صحت پر تنقید کرتے ہوئے فنڈنگ روکنے کا اعلان کر دیا۔

امریکا میں کرونا سےہلاکتوں کی تعداد 13ہزار سے زائد اور متاثرہ افراد کی تعداد 4 لاکھ 412 ہو گئی۔ نیو یارک میں گذشتہ 24 گھنٹوں کے دوران کرونا وائرس کے باعث 731 ہلاکتیں ہوئی ہیں جو اب تک ایک دن میں ریکارڈ کی جانے والی سب سے بڑی تعداد ہے۔

امریکی صدر ڈونلڈ ٹرمپ عالمی ادارہ صحت پر برس پڑے، انہوں نے عالمی ادارہ صحت پر چین میں کورونا وائرس کے ابتدائی پھیلاؤ سے متعلق غلط فیصلے کرنے کا الزام بھی عائد کیا۔ امریکی صدر نے عالمی ادارہ صحت کو ہر سال دی جانے والے 58 ملین ڈالر کی فنڈنگ روکنے کا بھی اعلان کیا۔ امریکی گلوکار جان پرنس بھی کرونا کی وجہ سے ہلاک ہو گئے۔

اٹلی میں کرونا سے دنیا میں سب سے زیادہ ہلاکتیں ہوئیں جہاں 17 ہزار 127 افراد جان سے گئے اورایک لاکھ 35 ہزار 586 افراد متاثر ہیں۔

فرانس میں ایک روز میں 14 سو سے زائد افراد کرونا سے چل بسے اور مجموعی طور پر10 ہزار3 سو سے زائد افراد ہلاک ہوچکے ہیں اور ایک لاکھ  دس ہزار سے زائد کیسز رپورٹ ہوچکے ہیں۔

اسپین میں کرونا وائرس کے سبب14 ہزار سے زائد افراد ہلاک ہوچکے ہیں اور ایک لاکھ 42 ہزار کے قریب کیسز رپورٹ ہوئے۔

جرمنی میں ایک لاکھ سے زائد کیسز ہیں اور2 ہزار سے زائد افراد ہلاک ہوچکے ہیں۔ نیدر لینڈز اور بیلجیئم میں  بھی 2 دو ہزار سے زائد اموات ہو چکی ہیں۔

ایران میں عدالتی ترجمان کا کہنا ہے کہ کرونا وائرس کی وبا پھوٹنے کے بعد اب تک ایران میں زہریلی شراب پینے کے بعد 600 سے زائد افراد ہلاک ہو چکے ہیں۔ لوگوں کا خیال تھا کہ الکوہل سے وہ کرونا سے محفوظ رہ سکتے ہیں۔