ساﺅتھمپٹن ٹیسٹ۔دوسرے روزکا کھیل تاخیر سے شروع

پاکستان اور انگلینڈ کے درمیان جاری دوسرے ٹیسٹ میچ کے دوسرے روز کا کھیل بھی بارش کے باعث تاخیر سے شروع ہو گیا۔پاکستان نے5 کھلاڑیوں کے نقصان پر135رنز بنا لیے،بابراعظم34 اوررضوان4رنز بنا کرکریز پرموجود ہیں۔

تفصیلات کے مطابق پاکستان اورانگلینڈ کے درمیان دوسرا ٹیسٹ میچ ساﺅتھمپٹن میں کھیلا جا رہا ہے جس کے پہلے دن کے اختتام تک پاکستان نے5 کھلاڑیوں کے نقصان پر126 رنزاسکور بنائے۔

میچ کے پہلے روز قومی ٹیم کے کپتان اظہرعلی نے ٹاس جیت کر پہلے بیٹنگ کرنے کا فیصلہ کیا اور بارش سے متاثرہ دن میں صرف 46 اوورزہی کروائے جاسکے جس میں پاکستان کی آدھی ٹیم صرف 126 رنز پر پویلین واپس لوٹ گئی۔

گزشتہ میچ کے سنچری میکر شان مسعود صرف ایک رنز کے مہمان ثابت ہوئے جبکہ کپتان اظہر علی اور اسد شفیق ایک بار پھر ناکام ثابت ہوئے اور دونوں بالترتیب 20 اور5 رنز بناسکے۔11 سال بعد ٹیسٹ اسکواڈ کا حصہ بننے والے فواد عالم صرف 4 گیندوں کے مہمان ثابت ہوئے اورکھاتہ کھولے بغیر پویلین واپس لوٹ گئے، عابد علی نصف سنچری بنانے میں کامیاب رہے لیکن انہوں نے بھی 60 رنز پر اپنی وکٹ گنوادی۔