افغانستان۔القاعدہ رہنما محسن المرسی کو ہلاک کردیا گیا

افغان صوبے غزنی میں ایک خصوصی آپریشن کے دوران انتہائی مطلوب القاعدہ رہنما محسن المرسی کو ہلاک کردیا گیا۔

افغانستان کے نیشنل ڈائریکٹوریٹ آف سیکیورٹی (این ڈی ایس) کی جانب سے کی گئی ٹوئٹ کے مطابق افغان صوبے غزنی میں ایک خصوصی آپریشن میں کیا گیا، جس میں القاعدہ رہنما محسن المرسی ہلاک ہوگئے ۔

محسن المرسی کو القاعدہ کا اہم لیڈر سمجھا جاتا تھا، ان کا نام امریکی فیڈرل بیورو آف انویسٹی گیشن (ایف بی آئی) کی انتہائی مطلوب دہشت گردوں کی فہرست میں شامل تھا۔

امریکی نیشنل کاؤنٹر ٹیررازم سینٹر کے سربراہ کرس ملر نے بھی محسن المرسی کی ہلاکت کی تصدیق کی ہے ، انہوں نے اپنے بیان میں کہا ہے کہ محسن المرسی کی ہلاکت القاعدہ کے لیے بڑا دھچکہ ہے۔