نیوزی لینڈ کیخلاف تین ٹی ٹونٹی سیریزکیلیے قومی کرکٹ ٹیم کا اعلان

پاکستان کرکٹ بورڈ نے نیوزی لینڈ کیخلاف تین ٹی ٹونٹی میچزکی سیریز کیلیے قومی کرکٹ ٹیم کے 18 رکنی اسکواڈ کا اعلان کردیا، میچ 18، 20 اور22 دسمبرکو کھیلے جائیں گے ۔

نیوزی لینڈ کے خلاف ٹی ٹوینٹی سیریزکیلیے پاکستانی اسکواڈ کا انتخاب مصباح الحق نے کپتان بابراعظم کی مشاورت سے کیا ۔ پاکستان کی قومی کرکٹ ٹیم اور شاہینزاسکواڈ 14 روزہ آئیسولیشن کا دورانیہ مکمل کرنے کے بعد کوینز ٹاﺅن کیلیے 8 دسمبر کو روانہ ہوں گے۔

دونوں ٹیمیں مختلف ہوٹلوں میں قیام کریں گی اورمختلف اوقات میں ہی گرائونڈ میں ٹریننگ کریں گی ،14 دسمبر کو پاکستان شاہینز” وانگرائی“ کیلیے روانہ ہوگی جبکہ قومی ٹیم 15 دسمبرکواپنا پہلا ٹی ٹوینٹی میچ کھیلنے کیلئے آکلینڈ پہنچے گی ۔

نیوزی لینڈ کے خلاف تین ٹی ٹونٹی میچزکی سیریزکیلیے اسکواڈ میں سرفرازاحمد اورحسین طلعت کی واپسی ہوئی ہے،دونوں کو روحیل نظیراورشاہین ظفرگوہرکی جگہ ٹیم میں شامل کیا گیاہے ۔قومی ٹیم کی کپتانی بابراعظم کریں گے جبکہ وائس کپتان شاداب خان ہوں گے ۔

ان کے علاوہ اسکواڈ میں عبداللہ شفیق ، فیہم اشرف ، حیدر علی ، حارث روف ، حسین طلعت ، افتخار احمد ، عماد وسیم ، خوشدل شاہ ، محمد حفیظ ، محمد حسنین ، موسیٰ خان ، محمد رضوان ، سرفراز احمد ،شاہین شاہ آفریدی ، عثمان قادر اور وہاب ریاض شامل ہیں ۔

فخر زمان نے زمبابوے کیخلا ف سیریز کے تینوں میچوں میں شرکت کی تاہم بخار میں مبتلا ہونے کے باعث وہ دورہ نیوزی لینڈ کا حصہ نہیں بن سکے ۔ٹی ٹوینٹی سیریز کھیلنے کے بعد 23 دسمبر کو عماد وسیم آسٹریلیا میں بگ بیش لیگ کا حصہ بننے کیلیے روانہ ہوں گے جبکہ 24 دسمبر کو محمد حفیظ پاکستان لوٹ آئیں گے۔