پانچ فروری کا جلسہ راولپنڈی کے بجائے مظفرآباد میں ہو گا۔شاہد خاقان عباسی

پی ڈی ایم نے پانچ فروری کو یوم یکجہتی کشمیرکے موقع پر راولپنڈی میں شیڈول جلسے کا مقام تبدیل کرتے ہوئے مظفر آباد میں کرنے کا اعلان کردیا ۔

تفصیلات کے مطابق وزیراعظم آزاد کشمیر اور شاہد خاقان عباسی نے پی ڈی ایم کے سربراہ مولانا فضل الرحمن سے ملاقات کی جس دوران یوم یکجہتی کشمیر راولپنڈی کی بجائے کشمیریوں کے ساتھ منانے کی تجویز پیش کی جسے منظورکرلیا گیا ، جلسے کے مقام کی تبدیلی کا فیصلہ ن لیگ کی درخواست پرکیا گیا ہے۔

شاہد خاقان عباسی میڈیا سے گفتگو کررہے تھے کہ اس دوران صحافی نے سابق وزیراعظم سے سوال کیا کہ آپ پانچ فروری کے پی ڈی ایم کے جلسے سے متعلق کیا کہیں گے ؟ شاہد خاقان عباسی نے جواب دیتے ہوئے کہا کہ پانچ فروری کا جلسہ راولپنڈی کے بجائے مظفرآباد میں ہو گا، یوم یکجہتی کشمیر مظفر آباد میں منائیں گے ۔

شاہد خاقان عباسی کا کہناتھا کہ عدالتوں میں کیمرے لگائیں اوردیکھیں کس نے کرپشن کی، آج نیب سے کوئی پوچھنے والانہیں، نیب ملک میں سیاست کوناکام اوربدنام کرنے کاطریقہ ہے، جوکیس بنائے جارہے ہیں جھوٹ کے سواکچھ نہیں، کیسزتاثرپیداکرنے کاطریقہ ہے کہ سیاستدان کرپٹ ہیں، احتساب کی بات کرنی ہے توبراڈشیٹ کے حقائق عوام کے سامنے رکھیں۔