حلقہNA-249سے نوازشریف کی کامیابی ووٹ کوعزت دوکے نظرئیےکی کامیابی ہوگی،مفتاح اسماعیل

پاکستان مسلم لیگ(ن) سندھ کے جنرل سیکریٹری اور کراچی کے حلقے NA-249 کے ضمنی الیکشن  کے لئے میاں محمد نواز شریف کے نامزد امیدوار مفتاح اسماعیل نے کہا ہے کہ ڈسکہ کے عوام نے میاں محمدنواز شریف کی شیرنی کو کامیاب کر کے کراچی کے عوام کے لئے پیغام بھیجا ہے کہ پاکستان کو سنوارنے کے لئے کراچی کے عوام بھی میاں نواز شریف کے شیر کی کامیابی یقینی بنائیں.

کراچی کے علاقہ سعید آباد بلدیہ ٹاؤن میں مسلم اسٹوڈنٹس فیڈریشن(ن) ضلع کیماڑی کی جانب سے منعقد کی گئی کارنر میٹنگ کے شرکا ایم ایس ایف(ن) کے صوبائی جنرل سیکریٹری عاقب خان تنولی، ڈویژنل صدر سردار محمد سہیل، ضماد عالم خان، محسن شاہ، عثمان یوسفزئی، غلام مجتبی، رانا شوکت، سید ابراہیم شاہ، عمر غنی، نبیل آفریدی، شعیب خان، امتیاز ابڑو، خلیل میتلو، اشرف زمان، ذاکر خان اور حاذق آرائیں اور حلقے کے ووٹرز کی بڑی تعداد سے خطاب کرتے ہوئے مفتاح اسماعیل نے کہا کہ ضلع غربی کے عوام کی قسمت بدلنے کے دن قریب ہیں۔

میاں محمد نواز شریف کراچی بالخصوص ضلع غربی کے عوام کو ہمیشہ اپنے دل کے قریب رکھتے ہیں. جس طرح ملک بھر کے ضمنی انتخابات میں پاکستان کے باشعور عوام نے نا اہل اور مہنگائی کے ذمہ دار حکمرانوں کو مسترد کیا ہے کراچی کے عوام بھی مسلط حکمرانوں سے نجات کے لئے اپنا کردار اداکریں گے اور شیر کو کامیاب کر کے حکمرانوں پر واضح کر دیں گے کہ اب ان کے لئے پاکستان کے کسی صوبے میں کوئی جگہ باقی نہیں.

مفتاح اسماعیل نے کہا کہ ضلع غر بی کے عوام کو یقین دلاتا ہوں کے جب تک ضلع غربی کی سڑکیں، ہسپتال اور پانی کے مسائل حل نہیں ہونگے نہ خود چین سے بیٹھوں گا اور نا ہی وفاقی اور صوبائی حکومتوں کو چین سے بیٹھنے دوں گا.

مسلم لیگ(ن) کے امیدار مفتاح اسماعیل کی انتخابی مہم کے سلسلے میں منعقد کی گئی مسلم اسٹوڈنٹس فیڈریشن(ن) کی کارنر میٹنگ سے خطاب کرتے ہوئے صوبائی صدرمسلم اسٹوڈنٹس فیڈریشن (ن) سندھ یاسر عدیل شیخ نے کہا کہ ڈسکہ کے عوام نے کراچی کے باشعور شہریوں کو مسلم لیگ(ن) کی کامیابی کا تحفہ بھیجا ہے. کراچی کے عوام بھی ڈسکہ کے شہریوں کو مایوس نہیں کریں گے.

حلقہNA-249 سے میاں محمدنواز شریف کی کامیابی ووٹ کو عزت دو کے نظرئیے کی کامیابی ہوگی. کراچی کے عوام اپنے محسن میاں محمد نواز شریف کو کبھی مایوس نہیں کریں گے.کراچی سے میاں محمد نواز شریف کے شیر مفتاح اسماعیل کی کامیابی سے محترمہ مریم نواز شریف کے وزیر اعظم پاکستان بننے کی منزل مزید قریب آجائے گی.