غزہ پر مزید 60 فضائی حملے۔ 26 فلسطینی شہید

اسرائیل کی بربریت کا سلسلہ جاری ہے ، صہیونی طیاروں نے آج صبح غزہ کے علاقوں پر 60 فضائی حملے کیے جن میں مزید 26 فلسطینی شہید اور 50 زخمی ہو گئے، جاں بحق افراد کی تعداد 181 ہو گئی۔

میڈیا رپورٹس کے مطابق اسرائیلی فورسز کی بمباری سے شہداکی تعداد 181ہو گئی ، شہدامیں 41بچے اور23خواتین بھی شامل ہیں، فلسطین کے مغربی کنارے میں اسرائیلی فوجیوں کی فائرنگ سے 13فلسطینی شہید ہو گئے ۔

نجی ٹی وی کے مطابق فلسطینی وزرارت صحت نے بتایا کہ غزہ کے ہسپتالوں میں کئی زخمی لائے جا رہے ہیں جبکہ ہزاروں فلسطینی نقل مکانی کرنے پر مجبور ہو گئے ہیں ، فلسطینی اقوام متحدہ کے aسکولوں میں پناہ لینے پر مجبور ہیں ۔تازہ بمباری میں دو عمارتیں تباہ ہو گئیں ، تباہ عمارتوں کے ملبے تلے متعدد افراد دب گئے ہیں۔

صہیونی فورسزکی جانب سے حماس چیف یحییٰ السنورکے گھر کو بھی نشانہ بنایا گیا ، اسرائیل نے اقوام تمحدہ کے فلسطینی کیمپ پر بھی بمباری کی ۔نمائندہ امریکی سرکاری خبر ایجنسی کے مطابق غزہ میں کوئی جگہ محفوظ نہیں رہی ۔

دوسری جانب اسرائیلی دہشتگردی کے خلاف امریکا ، برطانیہ سمیت دنیا بھر میں مظاہرے کئے گئے ، مظاہرین نے مطالبہ کیا کہ اسرائیل کی فلسطینیوں پر دہشتگردی روکی جائے ، فلسطین کو آزاد کر کے غیر قانونی قبضہ ختم کرایا جائے ۔

فرانس میں پابندی کے باوجود اسرائیل کے خلاف بڑے مظاہرے ہوئے ، پولیس کی جانب سے مظاہرین کو منتشر کرنے کے لئے آنسو گیس کی شیلنگ کی گئی۔ جرمنی کے شہر برلن سمیت تین مقامات پر مظاہرے ہوئے ، مظاہرے فرینکفرٹ، لپزگ اور ہیمبرگ میں ہوئے ۔

یونان کے دارالحکومت ایتھنز میں ہزاروں افراد نے امریکی سفارتخانے کے باہر مظاہرہ کیا،مظاہرین نے فلسطین کی آزادی کے حق میں نعرے لگائے ،بون اور میونخ میں مظاہرین نے اسرائیلی جھنڈے بھی جلائے ۔