وارم اپ میچ۔ پاکستان ،جنوبی افریقہ سے شکست کھا گیا

دبئی:آئی سی سی ٹی ٹوئنٹی ورلڈ کپ کے وارم اپ میچ میں جنوبی افریقہ نے دلچسپ مقابلےکے بعد آخری اوور میں پاکستان کو شکست دے دی ۔ پاکستان نے پہلے بیٹنگ کرتے ہوئے مقررہ 20اوورز میں6وکٹوں کے نقصان پر186رنز بنائے ۔جنوبی افریقہ نے مطلوبہ ہدف سخت مقابلے کے بعد آخری گیند پر حاصل کیا ۔جنوبی افریقہ کے بلے باز وین ڈر ڈوسن نے51گیندوں پر سنچری اسکورکرکے ٹیم کی کامیابی میں اہم کردار اداکیا ۔

تفصیل کے مطابق جنوبی افریقہ نے ٹاس جیت کر پہلے باولنگ کافیصلہ کیا ۔پاکستان کی جانب سے اوپنرز محمد رضوان 19اور بابر اعظم 15رنز بناکر آوٹ ہوئے ۔تیسرے نمبر پر آنے والے فخر زمان نے شاندار کار کردگی کا مظاہرہ کرتے ہوئے محض 28گیندوں پر 52رنز بنائے اور ریٹائرڈ آوٹ ہو گئے ۔ محمد حفیظ 13رنز بنا کرآوٹ ہوئے ۔شعیب ملک 28جبکہ آصف علی 32رنز بنا کر آوٹ ہوئے ۔جنوبی افریقہ کی جانب سے کاگیسو ربادا تین وکٹیں لے کر سر فہرست رہے جبکہ انرچ نورجے اور مہاراجہ نے ایک ایک وکٹ حاصل کی ۔

جواب میں جنوبی افریقہ کی جانب سے اوپنرز اچھا کھیل پیش نہ کر سکے ،کوئنٹن ڈی کوک چھ جبکہ ریزہ ہینڈرکس سات رنز بنا کرآوٹ ہوئے ہیندرک کلاسن 14رنز بنا کرآوٹ ہوئے۔تمبا بھوما 46رنز بنا کرآوٹ ہوئے ۔ پاکستان کی جانب سے عماد وسیم اور شاہین آفریدی نے دو ،دو وکٹیں حاصل کیں ۔