کالعدم تحریکِ لبیک اور حکومت میں مذاکرات کے دو دور بے نتیجہ ختم

پیرعنایت الحق شاہ نے بعدازاں ایک ویڈیو پیغام میں کہا ہے کہ ان کے خیال میں حکومت اب ان مذاکرات میں سنجیدہ نہیں۔ اپنی بات کی وضاحت کرتے ہوئے ان کا کہنا تھا کہ ’آج کی ملاقات انتہائی مایوس کن رہی ہے۔ کل ہمیں یہ ایک امید نظرآ رہی تھی کہ وزیر اعظم صاحب کی واپسی پر یہ معاملات حل ہوں گے مگر آج ملاقات میں شیخ صاحب پھر اسی بات پر کھڑے ہیں کہ میں اس کمیٹی میں آنا ہی نہیں چاہتا تھا۔ یہ پنجاب کا مسئلہ ہے، یہ میرا مسئلہ ہے ہی نہیں،آپ لوگ جب فیض آباد آ جائیں گے تو پھر میرا مسئلہ شروع ہو جائے گا۔

پیر عنایت کا کہنا ہے کہ میں یہ سمجھتا ہوں کہ میرے خیال میں پی ٹی آئی کے اندر ایسے لوگ ہیں جو سیاسی شہید بننا چاہتے ہیں۔ اور ملک پاکستان میں افراتفری چاہتے ہیں، میں اس موقع پر آرمی چیف قمر جاوید باجوہ، چیف جسٹس آف پاکستان سے بھی گزارش کروں گا کہ وہ اس میں اپنا کردار ادا کریں اور اس ملک کو دنگا فساد سے بچائیں۔