پاکستانی کرکٹ ٹیم کو اسلام نے یکجا رکھا ہوا ہے۔ میتھیو ہیڈن

دبئی۔ قومی کرکٹ ٹیم کے بیٹنگ کنسلٹنٹ میتھیو ہیڈن نے کہا کہ پاکستانی کرکٹ ٹیم کو اسلام نے یکجا رکھا ہوا ہے جو ایک اچھی بات ہے ۔

ورچوئل پریس کانفرنس میں میتھیو ہیڈن نے کہا کہ آسٹریلیا کا کپ جیتنے کا ریکارڈ شاندار ہے ، میں آسٹریلیا کیلیے 20 سال کھیلا ہوں وہاں کی کرکٹ کو اچھی طرح سمجھتا ہوں ، پاکستان کے پاس بہت اچھے کھلاڑی موجود ہیں ، میں اس ٹیم کے ساتھ کم عرصہ کیلیے ہوں مگر جانتا ہوں کہ یہ کتنے اچھے کھلاڑی ہیں ، یہ کسی بھی ٹیم کیخلاف اچھا کھیل سکتے ہیں ،ان کی اصل طاقت اسلام ہے  جس نے انہیں یکجا رکھا ہے ۔

میتھیو ہیڈن نے  پریس کانفرنس میں فخر زمان کی تعریف کرتے ہوئے کہا کہ فخر کا نیوی میں ہونا ثابت کرتا ہے کہ وہ لڑنا جانتا ہے ، فخرزمان کا ٹی 20 سیٹ اپ میں اہم کردار ہے ، وہ گراؤنڈ میں بطور فیلڈر بہت رنز ہونے سے بچاتا ہے ۔ بھارت کے خلاف اعتماد سے کھیلنے سے شاندارآغاز ملا ، بابر تسلسل سے رنز بنارہے ہیں اور ویرات کوہلی کی طرح جارحیت نہیں دکھاتے ، بابر ہنر سے مالا مال اور مستقل مزاج کا کھلاڑی ہے ۔

شاہین شاہ آفریدی سے متعلق میتھیو ہیڈن نے کہا کہ شاہین ایک تباہ کن باؤلر ہے ، بھارتی اوپنرز کے ایل راہول کو بولڈ کرنے والی ان کی گیند شاندار تھی ، ییہ شاہین کیلئے ایک بڑا چیلنج ہے کہ وہ کس طرح مسلسل کھیل رہا ہے ۔