پشاور۔ پولیس مقابلے میں 3دہشت گرد ہلاک

پشاور:فقیرآباد میں واقع قبرستان کے قریب پولیس مقابلے میں 3دہشت گرد ہلاک ہو گئے۔

میڈیا رپورٹس کے مطابق مطابق پشاورکے علاقے فقیر آباد میں واقع  قبرستان کے قریب سے برآمد ہونے والی 3 لاشوں پر پولیس کا کہنا ہے کہ تینوں افراد پولیس مقابلے  میں ہونے والی فائرنگ کے تبادلے میں ہلاک ہوئے۔

سی سی پی او پشاور کے مطابق پولیس مقابلے میں مارے جانے والے دہشتگردوں کا تعلق داعش سے تھا جن میں  کمانڈر حیات بھی شامل ہے۔

پولیس حکام نے بتایا کہ تھانہ فقیرآباد کی حدود میں خفیہ اطلاع پر پولیس اور سی ٹی ڈی کا مشترکہ آپریشن جاری تھا کہ اس  دوران دہشت گردوں نے پولیس پارٹی پر اندھا دھند فائرنگ شروع کردی، پولیس کی جوابی فائرنگ میں 3 دہشت گرد ہلاک ہوگئے۔

پولیس کے مطابق تینوں دہشت گرد  تخریب کاری، ٹارگٹ کلنگ اوردیگر سنگین مقدمات میں مطلوب تھے اورمقابلے کے وقت بھی  فقیر آباد کے علاقہ رنگ روڈ قبرستان میں سنگین واردات کی غرض سے موجود تھے۔