متحدہ کے سابق سینیٹرمیاں عتیق لاہور سے گرفتار

لاہور: متحدہ قومی موومنٹ (ایم کیو ایم) پاکستان کے سابق سینیٹر میاں محمد عتیق کو پولیس نے گرفتار کرلیا۔ تفصیلات کے مطابق میاں محمد عتیق کو راولپنڈی کے تھانہ گنج منڈی میں جون 2021ء میں ضلعی انتظامیہ کی جانب سے دائر کیے گیے مقدمے میں گرفتار کیا گیا ہے۔

پولیس کے مطابق میاں عتیق پر جعلی پراپرٹی دستاویز پیش کرنے کا الزام ہے، وہ اور دیگر ملزمان اس مقدمے میں اشتہاری ہیں۔ راولپنڈی پولیس کی درخواست پر لاہور قلعہ گجر سنگھ پولیس نے سابق سینیٹر کو گرفتار کیا، جنہیں اب راولپنڈی پولیس کے حوالے کیا جائے گا۔

راولپنڈی پولیس کے ترجمان نے گرفتاری کی تصدیق کرتے ہوئے کہا کہ میرٹ پر تفتیش کرتے ہوئے مقدمہ کو یکسوئی کے ساتھ حل کیا جائے گا، پولیس قانون کی بالادستی اور میرٹ پر یقین رکھتی ہے، جسے ہر صورت یقینی بنایا جائے گا۔