دوسرا ٹیسٹ۔پاکستان کو 246رنز سے شکست

گال:سری لنکا نے پاکستان کو دوسرے ٹیسٹ میں 246رنز سے شکست دے کرسیریز1-1 برابر کردی سری لنکن بولر جے سوریا نے5 شکار کیے جبکہ پاکستان کی جانب سے  بابر اعظم 81 رنز بنا کر نمایاں رہے ۔دھننجایا ڈی سلوا مین آف دی میچ رہے۔

تفصیلات کے مطابق گال کرکٹ اسٹیڈیم میں کھیلے گئے دوسرے ٹیسٹ میچ میں سری لنکا کیخلاف پاکستان کی پوری ٹیم دوسری اننگز میں صرف261 رنزبنا سکی، پاکستان نے آخری روزاپنی دوسری اننگز کا آغاز 89 رنزایک وکٹ کے نقصان پر کیا، امام الحق 46اور بابر اعظم 26رنزکے ساتھ گراؤنڈ میں اترے لیکن کچھ ہی دیر بعد امام الحق 49رنز بنا کر رمیشن مینڈس کا شکار بن گئے ،بابر اعظم کا ساتھ محمد رضوان نے دیا اوراسکورکو176تک پہنچایا وہ 37 رنز بنا کر جے سوریا کا شکا ربنے ،اس طرح پاکستان کی تیسری وکٹ گرگئی جس کے بعد فواد عالم میدان میں اترے لیکن وہ صرف ایک رن ہی بنا سکے اور رن آؤ ٹ ہو گئے اس کے کچھ دیر بعد ہی پاکستان کی پانچویں وکٹ بھی گر گئی جوآغا سلمان کی تھی وہ جے سوریا کی گیند پر مینڈس کے ہاتھوں کیچ آؤ ٹ ہوئے اور یوں صرف 11رنز کے اندر ہی پاکستان کی 3 وکٹیں گر گئیں۔

کھانے کے وقفے کے بعد بابر اعظم کا ساتھ دینے کیلیے محمد نوازکریز پر آئے لیکن بابراعظم نے مشکلات کا شکار ٹیم کا ساتھ چھوڑ دیا اور 81رنز بنا کرجے سیوریا کا شکار بنے، اس طرح 205 رنز پر پاکستان کی چھٹی وکٹ گر گئی  اور اگلے ہی اوور میں محمد نواز فقط 12 رنز بنا کر مینڈس کا شکار ہو گئے ،یاسر شاہ 27، حسن علی 11 اورنسیم شاہ 18 رنز بناکر پویلین لوٹے ،نعمان علی ناٹ آئوٹ رہے اس طرح  سری لنکا نے فتح حاصل کرلی ۔