ابوظبی میں اسپتال کے باہر گاڑی پلر سے ٹکرا گئی، 2افراد ہلاک

ابوظبی:متحدہ عرب امارات میں ابوظبی کے کلیفلینڈ کلینک اسپتال کے باہرایک گاڑی کنکریٹ پلر سے ٹکرا گئی جس کے نتیجے میں  دو افراد ہلاک اور ایک شدید زخمی ہوگیا۔

عرب میڈیا کے مطابق محکمہ ٹریفک نے بیان میں کہا کہ ابتدائی تحقیقات سے یہ بات سامنے آئی ہے کہ ڈرائیورکے گاڑی پر کنٹرول کھو دینے کے باعث حادثہ پیش آیا۔ گاڑی ٹریک سے ہٹ کر اسپتال کے استقبالیہ کے سامنے کنکریٹ پلر سے ٹکرا گئی۔

محکمہ ٹریفک کے کنٹرول سینٹر نے اطلاع ملتے ہی پولیس، ایمبولینس اور امدادی ٹیم جائے وقوعہ روانہ کیں۔ حادثے میں زخمیوں کو علاج کے لیے ہسپتال میں داخل کردیا گیا۔

ابوظبی پولیس نے شہریوں اور مقیم غیر ملکیوں پر زور دیا ہے کہ وہ احتیاط سے گاڑی چلائیں اور قوانین کی پابندی کریں تاکہ ٹریفک حادثات سے بچا جاسکے۔