سندھ ہائیکورٹ: مضر صحت اشیاء کی فروخت پر پابندی یقینی بنانے کا حکم

کراچی : سندھ ہائی کورٹ نے مضر صحت پان مصالحہ ،مین پوری گٹکے پر پابندی سے متعلق درخواست پر انسانی صحت کے لیے مضر اشیاء کی فروخت پر پابندی یقینی بنانے کا حکم دے دیا ۔ عدالت نے سیکرٹری لوکل گورنمنٹ اور آئی جی سندھ کو ٹوبیکو پان مصالحہ ،گٹکا مین پوری فروخت کرنے والوں کے خلاف کارروائی کی بھی ہدایت کردی۔

جمعہ کو سندھ ہائی کورٹ میں مضر صحت پان مصالحہ ،مین پوری گٹکے پر پابندی سے متعلق درخواست پر سماعت ہوئی ۔ دوران سماعت رجسٹرار ٹریڈ مارک کی جانب سے  رپورٹ عدالت میں پیش کی گئی ۔ رپورٹ میں بتایا گیا کہ دو لاکھ سے زائد ٹوبیکو ٹریڈ مارک سرٹیفیکیٹ جاری کیے ہیں ، لیکن یہ بتانے کی پوزیشن میں نہیں ہیں کہ ٹوبیکو پان مصالحہ کو کتنے سرٹیفیکیٹ جاری کیے گئے ہیں ، آئندہ سماعت پر ریکارڈ کی اسکروٹنی کرکے رپورٹ جمع کروادی جائے گی ، پچاس سرٹیفیکیٹ ایسے جاری کیے ہیں جو بظاہر ٹوبیکو پان مصالحہ سے متعلق لگتے ہیں

۔ بعد ازاں عدالت نے رپورٹ کی کاپی اسسٹنٹ اٹارنی جنرل ،ایڈووکیٹ جنرل اور درخواست گزار کو فراہم کرنے کی ہدایت کردی۔ عدالت نے  چھالیہ کے استعمال اور فروخت سے متعلق وفاقی اور صوبائی حکومتوں کے وکلاء سے دلائل طلب کرلئے۔ عدالت نے آئی جی سندھ کو ایڈیشنل آئی جی رینک کے آفیسر کو عدالتی احکامات پر عملدرآمد کراکر رپورٹ پیش کرنے کا حکم دے دیا۔ عدالت نے درخواست کی مزید سماعت 29 اکتوبر تک ملتوی کردی۔