سعودی عرب میں کار چھت پر جا چڑھی۔ قسمت کا دھنی ڈرائیور بچ گیا

ریاض(امت نیوز) سعودی عرب میں حال ہی میں ایک عجیب وغریب ٹریفک حادثہ پیش آیا۔
حادثے کی ایک ویڈیو سوشل میڈیا کے مختلف پلیٹ فارمز پر بڑے پیمانے پر گردش کر رہی ہے جس میں ایک کار کو ایک گھر کی دیوار کے ذریعے چھت پر چڑھا ہوا دیکھا جاسکتا ہے۔
سماجی رابطوں کی ویب سائٹس نے اس ٹریفک حادثے کو گاڑی کے گھر کی دیوار پر چڑھ جانے کی وجہ سے ہونے والا عجیب وغریب حادثہ قرار دیا ہے، ساتھ ہی گاڑی کے ڈرائیور کی قسمت پر بھی حیرت کا اظہار کیا جو اس حادثے میں محفوظ رہا۔
سعودی ٹریفک پولیس نے "ٹویٹر” پر اپنے اکاؤنٹ کے ذریعے بتایا کہ جدہ گورنری کی ٹریفک پولیس نے ایک شاہراہ عام پر تیز رفتاری سے سفر کرتے ہوئے حادثے کا شکار ہوجانے والی کار کی ایک ویڈیو جاری کی ہے۔
تیز رفتار کار ڈرائیور کے قابو سے باہر ہوجانے کے بعد سڑک سے ہٹ کر ایک مکان کی دیوار سے ہوتی ہوئی چھت پر جا چڑھی۔
ٹریفک پولیس نے نشاندہی کی کہ حادثے کے نتیجے میں گاڑی کا ڈرائیور معمولی زخمی ہوا۔