ورلڈ کپ فائنل میں پاکستان کے خلاف اچھا کھیلنا ہوگا، جوز بٹلر

میلبرن (اُمت نیوز)انگلش کرکٹ ٹیم کے کپتان جوز بٹلر نے کہا ہے کہ فائنل میں پاکستان جیسے سخت حریف کے خلاف کل نیا آغاز کریں گے۔
میلبرن میں پاکستان کے خلاف فائنل سے قبل پریس کانفرنس میں جوز بٹلر نے کہا کہ ورلڈکپ کھیلنے کی خوشی الگ ہوتی ہے اور ورلڈ کپ کا فائنل کھیلنا ہمارے لیے اعزاز ہے۔
انہوں نے کہا کہ پاکستان جیسے سخت حریف کے خلاف کل ٹی 20 ورلڈ کپ کے فائنل میں ایک نیا آغاز کریں گے۔
انگلش کپتان نے مزید کہا کہ پاکستان بہترین ٹیم ہے، ورلڈ کپ فائنل میں اس کے خلاف اچھا کھیلنا ہوگا۔
ان کا کہنا تھا کہ پاکستان کی تاریخ اچھے فاسٹ بولرز سے بھری پڑی ہے، شائقین کرکٹ کو فائنل میں سخت مقابلہ دیکھنے کو ملے گا۔
جوز بٹلر نےیہ بھی کہا کہ اس وقت بھی بہترین فاسٹ بولر پاکستان کے پاس ہیں لیکن ہمارے بیٹسمین بہترین بولنگ کا مقابلہ کرنا جانتے ہیں۔