2 سے زائد بچوں والے افراد الیکشن نہیں لڑ سکیں گے؟

نئی دہلی: بھارتی ریاست جھاڑ کھنڈ میں 2 سے زائد بچوں والے افراد الیکشن میں امیدوار نہیں بن سکتے۔

بھارتی میڈیا کے مطابق الیکشن کمیشن نے جھار کھنڈ میں ہونے والے میونسپل کارپوریشن کے انتخابات میں 2 سے زائد بچوں والے افراد کو انتخابات میں نااہل قرار دیدیا  اور وہ اب انتخابات میں حصہ نہیں لے سکیں گے۔

الیکشن کمیشن نے فیصلہ سناتے ہوئے کہا کہ جس کے 2 سے زیادہ بچے ہوں گے وہ ووٹ تو دے سکتا ہے البتہ امیدوار نہیں بن سکتا۔ فیصلے کے مطابق 9 فروری 2013 کے بعد بھی اگر کسی کے ہاں بچے کی پیدائش ہوئی تو وہ بھی الیکشن میں حصہ نہیں لے سکے گا۔

جھارکھنڈ نگر پالیکا ایکٹ 2011 کے مطابق ریاستی انتخابی کمیشن نے حکم جاری کیا ہے جبکہ ریاست میں 49 میونسپل کارپوریشن کے انتخابات اگلے کچھ دنوں میں ہونے والے ہیں۔

ریاستی الیکشن کمیشن کے مطابق جن امیدواروں کے بچے 2 سے زیادہ ہوں گے ان کی درخواستیں مسترد کر دی جائیں گی اور امیدواروں کی اہلیت کے حوالہ سے الیکشن کمیشن نے ڈپٹی کمشنر کو سختی سے کاغذات دیکھنے کی ہدایت کی ہے۔