عمران خان قاتلانہ حملہ کیس: ملزم نوید 14 روز بعد عدالت میں پیش

جمعرات 17 نومبر 2022, 8:31 شام آخری اپ ڈیٹ ہفتہ 19 نومبر 2022, 12:42 صبح قومی

گوجرانوالا: پاکستان تحریک انصاف کے چیئرمین عمران خان پر قاتلانہ حملہ کرنے والے ملزم نوید کو چودہ روز بعد عدالت میں پیش کیا گیا جہاں جج نے اُسے 12 روزہ جسمانی ریمانڈ پر پولیس کے حوالے کردیا۔

وزیرآباد پولیس نے لانگ مارچ میں فائرنگ اور اعترافی بیان ریکارڈ کروانے والے ملزم نوید کو گوجرانوالہ کی انسداد دہشت گردی کی عدالت میں پیش کیا، جہاں جج نے تفتیشی افسر پر ملزم کو عدالت میں 14 روز بعد پیش کرنے پر برہمی کا اظہار کیا۔

عمران خان پر قاتلانہ حملہ، ملزم بارہ روزہ جسمانی ریمانڈ پر پولیس کے حوالے

پولیس ذرائع کے مطابق واقعے کی تحقیقات کیلیے بنائے جانے والی جے آئی ٹی نے ملزم کو عدالت میں پیش کیا اور بتایا کہ ملزم کو تین نومبر کو جائے وقوعہ سے گرفتار کیا گیا جبکہ مقدمے کی ایف آئی آر 7 نومبر کو درج کی گئی۔

انسداد دہشت گردی عدالت کے جج نے ملزم کو کئی روز بعد پیش کرنے کے معاملے پر جے آئی ٹی کے سربراہ کو تحقیقات کرنے کا حکم دیتے ہوئے اگلی سماعت پر جواب طلب کرلیا۔

جے آئی ٹی نے وفاق کے تحفظات دور کیے بغیر ہی تحقیقات کا آغاز کردیا

دوسری جانب عمران خان قاتلانہ حملے کی تحقیقات کیلیے بنائی جانے والی پنجاب حکومت کی جے آئی ٹی نے وفاق کے تحفظات دور کیے بغیر ہی تحقیقات کا آغاز کردیا۔ مشترکہ تحقیقاتی ٹیم نے باضابطہ کام شروع کیا اور اس سلسلے میں سب سے پہلے وزیرآباد میں جائے وقوعہ کا دورہ کیا۔

جوائنٹ انویسٹی گیشن ٹیم کے دو ارکان سید خرم علی شاہ اور نصیب اللہ نے جائے وقوعہ کا دورہ کیا کر کے مزید شواہد حاصل کرنے کے لیے مقامات کی نشاندہی کی۔ اراکین وزیرآباد میں تحقیقاتی ٹیم کو ٹاسک سونپیں گے۔