آئین اور جمہوریت پر یقین رکھنے والے اسمبلیاں نہیں توڑتے،اعظم نذیر تارڑ

اسلام آباد(امت نیوز)وزیر قانون سینیٹر اعظم نذیر تارڑ نے کہا ہے کہ آئین اور جمہوریت پر یقین رکھنے والے اسمبلیاں نہیں توڑتے، اسمبلیاں توڑنے کا اعلان عمران خان کی آمرانہ اور فسطائی ذہنیت کا نتیجہ ہے

اعظم نذیرتارڑ کا کہناتھاکہ اسمبلیاں مدت پوری کریں گی تو پاکستان میں سیاسی اور معاشی استحکام آئے گا۔

انہوں نے کہا کہ 2018 کی “سلیکشن” کے باوجود ہم جمہوریت کے تسلسل کی خاطر پارلیمنٹ میں بیٹھے تھے کیونکہ پارلیمنٹ مدت پوری کرتی ہے تو جمہوریت مضبوط ہوتی ہے اور جمہوریت کے تسلسل سے معیشت ترقی کرتی ہے۔

وزیر قانون نے کہا کہ پارلیمنٹ کے تسلسل سے سیاسی استحکام آتا ہے، عوام کی ترقی کا عمل آگے بڑھتا ہے، سیاسی زلزلے اور آمرانہ آفٹرشاکس جاری رہیں تو معیشت مضبوط نہیں ہوتی اور مہنگائی بے قابو ہو جاتی ہے۔