دہشت گرد نے بیت الخلا جاتے ہوئے گارڈ کے سر پراینٹ ماری،خواجہ آصف

اسلام آباد:خیبر پختونخوا کے علاقے بنوں میں کاؤنٹر ٹیررازم ڈیپارٹمنٹ (سی ٹی ڈی) پر دہشت گردوں کے قبضے کے حوالے سے وفاقی وزیر برائے دفاع خواجہ آصف نے بتایا کہ سی ٹی ڈی آفس میں 33 کے قریب دہشت گرد قید تھے، جن کا تعلق مختلف جماعتوں سے ہے۔

الیکشن کمیشن کے باہر میڈیا سے گفتگو میں وزیردفاع نے بتایا کہ ایک دہشت گرد نے بیت الخلا جاتے ہوئے گارڈ کے سر پراینٹ ماری،گارڈ شہید ہوا تو دہشت گرد نے اس کا اسلحہ قبضے میں کرلیا اور باقی دہشتگردوں کو بھی رہا کرا لیا، جس کے بعد تمام نے مل کر عمارت پر قبضہ کرلیا۔

خواجہ آصف نے کہا کہ خیبر پختونخوا کی پوری حکومت زمان پارک میں بیٹھی ہے اور صوبے میں کوئی والی وارث نہیں ، سی ٹی ڈی کے بجائے فوج نے معاملات ہاتھ میں لے لیے ہیں۔

دوسری جانب بنوں پولیس کے حکام نے نام ظاہر نہ کرنے کی شرط پر بتایا کہ عسکریت پسند ہمسایہ ملک افغانستان میں محفوظ راستے کے لیے مذاکرات کے خواہاں ہیں۔ ایک کے مطابق، ’تقریباً 15 حملہ آوروں نے اتفتیش کاروں پر قابو پانے ،ہتھیاروں کو قبضے میں لینے اور ان میں سے 5 یا6 کو یرغمال بنانے کے بعد مرکز کا کنٹرول سنبھال لیا‘۔