ایم کیوایم،پی ایس پی مذاکرات ڈیڈ لاک کا شکار،احتجاج کی تاریخ بھی تبدیل

کراچی :متحدہ قومی موومنٹ پاکستان اور پاک سرزمین پارٹی رہنماؤں کے مذاکرات ڈیڈ لاک کا شکار ہوگئے جب کہ متحدہ نے احتجاج کی تاریخ بھی تبدیل کردی ہے۔

ذرائع کا کہنا ہے کہ ایم کیوایم میں مصطفیٰ کمال، انیس قائمخانی کو عہدے دینے کے معاملے پر متحدہ رابطہ کمیٹی دو حصوں میں تقسیم ہوگئی ہے،ایم کیو ایم کا مؤقف ہے کہ پی ایس پی رہنماؤں کو منہ مانگے عہدے نہیں دے سکتے، پی ایس پی رہنماؤں نے دو عہدے مانگے ہیں، مصطفیٰ کمال کو پارٹی کا سینئر ڈپٹی کنوینر بنانے اور انیس قائمخانی کو چیئرمین تنظیمی کمیٹی بنانے پر پی ایس پی کا اصرار ہے۔

پی ایس پی ذرائع کا کہنا ہے کہ ہمارے بھی ہزاروں کارکنان ہیں، جنہیں مطمئن کرنا ہے، البتہ اس معاملے پر ایم کیوایم قیادت سے بات چل رہی ہے، ابھی کچھ فائنل نہیں ہوا۔

ذرائع کے مطابق پی ایس پی، ایم کیوایم کے 9 جنوری کے احتجاج میں شرکت کرے گی، بلدیاتی انتخابات سے پہلے اہم پیش رفت متوقع ہے جب کہ پی ایس پی رہنماؤں کی آئندہ چند روز میں گورنر سندھ کامران ٹیسوری سے ملاقات بھی متوقع ہے۔

دوسری جانب ایم کیوایم پاکستان کا الیکشن کمیشن سندھ کے باہر ہونے والا احتجاج 9 جنوری کے بجائے اب 11 جنوری کو ہوگا۔