منشیات اسمگل کرنے کی کوشش کرنیوالا کبوترپکڑا گیا

ٹورنٹو: کینیڈین حکام کے مطابق ایک کبوتر کو جیل کے صحن میں منشیات سے بھرے بیگ کے ساتھ پکڑلیا گیا ہے۔عجیب اور حیران کن خبر کا اعلان کرتے ہوئے کینیڈین ایسوسی ایشن آف کریکشنل آفیسرز کے پیسیفک ریجنل صدر جان رنڈل نے کہا کہ کبوتر کو 29 دسمبر کو برٹش کولمبیا میں پیسیفک کریکشنل انسٹی ٹیوشن کے صحن میں پکڑا گیا تھا۔ کبوتر کے ساتھ منسلک بیگ میں منشیات موجود تھی۔

جان رنڈل نے کہا کہ حالیہ برسوں میں جیل کے افسران منشیات اور دیگر ممنوعہ اشیاء لے جانے والے ڈرونز کی تلاش میں رہتے تھے تاہم میں نے 13سالوں میں پہلی مرتبہ منشیات اسمگلنگ میں کسی پرندے کے استعمال کے بارے میں سنا۔

انہوں نے مزید کہا کہ ڈرون کے مقابلے میں کبوتر کے استعمال نے تفتیش میں مشکلات پیدا کی ہیں،منشیات کی اسمگلنگ میں مجرموں کی تخلیقی صلاحیتیں ہر ایک کے لیے تشویش کا باعث بنی ہیں۔