پنجاب میں پی ٹی آئی مخالف افسران کوتعینات کیا جارہا ہے،پرویزالہیٰ

لاہور(امت نیوز)سابق وزیراعلیٰ پنجاب چوہدری پرویز الہٰی نےکہاہےکہ پنجاب میں متنازع اور پی ٹی آئی مخالف افسران کو اہم عہدوں ہر تعینات کیا جارہا ہے

سابق وزیراعلیٰ سے اسپیکر پنجاب اسمبلی سبطین خان اور سابق ارکان صوبائی اسمبلی نے ملاقات کی ۔ اس موقع پر پرویز الہیٰ نے کہا کہ حکم ہوا ہے 25 مئی والے افسران فوری لگانے شروع کردیں، لوگوں کو گرفتار کرنے اور گھروں سے اٹھانے کا سلسلہ شروع کردیا گیا۔

انہوں نے کہا کہ نگراں وزیراعلیٰ کی تقرری کا متنازع فیصلہ عدلیہ میں چیلنج کررہے ہیں، الیکشن کمیشن غیر جانبداری سے شفاف الیکشن کی اپنی ذمے داری میں ناکام رہا ہے۔

چوہدری پرویز الہٰی نے  کہا کہ آنے والا وقت عمران خان کا ہے، جو کرپٹ مافیا کے آگے ڈٹ کر کھڑے ہیں، قوم پی ٹی آئی چیئرمین کے ساتھ ہے۔

انہوں نے کہا کہ انتخابات میں شکست پی ڈی ایم کا مقدر بنے گی، الیکشن کی تاریخ نہ دےکر آئینی ذمہ داری کی خلاف ورزی کی جارہی ہے۔