گڑھی خیرو میں زمین کا تنازع 6 جانیں نگل گیا

گڑھی خیرو (نمائندہ امت) گڑھی خیرو کے قریب زمین کا تنازع 6 جانیں نگل گیا، دودا پور میں تھہیم اور ببر برادریوں میں تصادم سے 5 افراد زخمی بھی ہوئے جنہیں اسپتال منتقل کر دیا گیا۔ پولیس نے علاقے کو گھیرے میں لے لیا، تاہم رات گئے تک کوئی گرفتاری عمل میں نہیں آئی تھی۔ تفصیلات کے مطابق گڑھی خیرو کے قریب چُھٹل آباد میں فائرنگ سے باپ بیٹے سمیت 6 افراد جاں بحق، اور 5 افراد زخمی ہوگئے۔

تھانہ دوداپور کے علاقے چھٹل آباد میں تھہیم اور ببر (جمالی) برادریوں کے درمیان زمین کے تنازع پر لڑائی ہوئی۔ جس میں جدید ہتھیاروں سے ایک دوسرے پر فائرنگ کی گئی، جس کے نتیجے میں نصراللہ، اس کا بیٹا نصیر احمد، دائم، خمیسو، بابل صابر ببر جمالی قتل ہو گئے۔ جبکہ رحیم، ظفر اللہ، صادق، اشرف اور حفیظ زخمی ہوئے۔

آخری اطلاعات تک فریقین ایک دوسرے پر جدید ہتھیاروں سے فائرنگ کر رہے تھے جبکہ پولیس نے علاقے کو گھیرے میں لے لیا، تاہم کوئی گرفتاری نہیں ہوئی۔ لاشوں اور زخمیوں کو اسپتالوں میں منتقل کر دیا گیا۔ لاشیں ضروری کارروائی کے بعد ورثا کے حوالے کی گئیں ، جو گھر پہنچنے پر کہرام مچ گیا، آخری اطلاعات تک واقعہ کا مقدمہ بھی درج نہیں ہوسکا تھا۔