پی ڈی ایم ضمنی الیکشن میں حصہ نہ لے،مولاناکاوزیراعظم کومشورہ

لاہور(امت نیوز)پاکستان ڈیموکریٹک موومنٹ سربراہ مولانا فضل الرحمان نےوزیراعظم شہبازشریف کو آئندہ ماہ ہونے والے قومی اسمبلی کے ضمنی انتخابات میں حصہ نہ لینے کا مشورہ دیا ہے

میڈیا رپورٹس  کے مطابق وزیراعظم شہباز شریف سے پی ڈی ایم کے سربراہ مولانا فضل الرحمان نے لاہور میں ملاقات کی۔ دونوں رہنماؤں نے عمران خان کے مختلف کیسوں کے بارے میں گفتگو کی۔

مولانا فضل الرحمان نے کہا کہ امید ہے کہ عمران خان جلد نااہل ہو جائیں گے، پی ڈی ایم کو قومی اسمبلی کے آئندہ ماہ ہونے والے ضمنی انتخابات میں حصہ نہیں لینا چاہیے۔

مولانا فضل الرحمان نے کہا کہ پنجاب و خیبر پختونخوا میں امن و امان اور اقتصادی صورتحال کو دیکھتے ہوئے ہی الیکشن کمیشن کو انتخابات کی تاریخ دینی چاہیے۔

شہباز شریف نے کہا کہ آل پارٹیز کانفرنس میں تمام جماعتوں کو الیکشن اور معیشت سمیت تمام قومی امور پر متفقہ لائحہ عمل اختیار کرنا چاہیے، ہم ملکی معیشت کو ٹھیک کرنے کے لئے دن رات کوشش کر رہے ہیں، مہنگائی کی لہر پر جلد قابو پا لیں گے۔

شہباز شریف نے مزید کہا کہ ہم تعمیری سیاست پر یقین رکھتے ہیں، یہ وقت تخریبی سیاست کا نہیں۔