میری ٹائم نمائش میں وزیرخارجہ ،وزیراعلیٰ سندھ و دیگر کی شرکت

کراچی(اسٹاف رپورٹر)بین الاقومی میری ٹائم ایکسپو نمائش میں لگائے گئے فشر مینز کوآپریٹو سوسائٹی کے اسٹال کا وفاقی وزیر خارجہ بلاول بھٹو زرداری،وفاقی وزیر پورٹ اینڈ شپنگ فیصل سبزواری،وزیراعلی سندھ سیدمراد علی شاہ سمیت اہم شخصیات نے دورہ کیا

جمعہ کے روز بین الاقومی میری ٹائم ایکسپونمائش کے پہلے روز ایڈمنسٹریٹر زاہدابراہیم بھٹی نے معززمہمانوں کااستقبال کرتے ہوئے انہیں فشر مینز کوآپریٹو سوسائٹی کی جانب سے ماہی گیروں کو مہیا کی جانے والی سہولیات کے حوالے سے آگاہی دی اورماہی  گیری میں جال سمیت استعمال ہونے والی مختلف چیزوں کے بارے میں معلومات فراہم کیں۔

وفاقی وزیر بلاول بھٹو زرداری نے شعبہ ماہی گیری کی ترقی کے لئے اسے جدید خطوط پر استوار کرنے کی ضرورت پر زور دیا۔

ایڈمنسٹریٹر زاہد ابراہیم بھٹی نے وفاقی وزیر خارجہ بلاول بھٹو زرداری کی آمد پر شکریہ ادا کیا۔اور انہیں فشر مینز کوآپریٹو سوسائٹی کی یادگاری شیلڈ پیش کی۔

وفاقی وزیر پورٹ اینڈ شپنگ فیصل سبزواری،وزیر اعلیٰ سندھ سیدمراد علی شاہ،کمشنر کراچی اقبال میمن، سیکریٹری  فشریز تمیزالدین خیرو،تاجروں اور دیگر اہم شخصیات  نے بھی فشر مینز کوآپریٹو سوسائٹی کے اسٹال کا دورہ کیا۔