پی ایس ایل:پشاور زلمی نے کراچی کنگز کو 2 رنز سے ہرادیا

کراچی (اسپورٹس ڈیسک)پاکستان سپر لیگ 8 کے دوسرے میچ میں پشاور زلمی نےکراچی کنگز کو 2 رنز سے شکست دیدی

نیشنل اسٹیڈیم  میں کھیلے گئے میچ میں کراچی کنگز کی ٹیم 200 رنز ہدف کے تعاقب میں 5وکٹوں پر 197 رنز بناسکی

46رنز پر کراچی کنگزکی 4 وکٹیں گرگئیں مگر اس کے بعد شعیب ملک اور عماد وسیم ڈٹ کر کھڑےہوگئے، دونوں کھلاڑیوں نے جارحانہ اسٹروکس کھیلے اوراسکور کو 177تک پہنچانےمیں کامیاب ہوگئے۔اس موقع پرشعیب ملک 52رنز بناکر آؤٹ ہوگئے ، عماد وسیم نے 80 رنز کی شاندار اننگز کھیلی مگر وہ بھی اپنی ٹیم کو شکست سے نہ بچاسکے

پشاور زلمی کی طرف سے وہاب ریاض اور جیمز نیشان نے 2-2 جبکہ سلمان ارشاد نے ایک وکٹ حاصل کی

اس سے قبل کراچی کنگز نے ٹاس جیت کر پشاور زلمی کو پہلے بیٹنگ کی دعوت دی، پشاور زلمی نے مقررہ بیس اوورز میں 5 وکٹوں پر 199رنز اسکور کئے۔

پشاور زلمی کی پہلی وکٹ 15 اور دوسری 16 رنز پرگری تاہم اس کے بعد بابر اعظم اور ٹام کیڈمور نے ٹیم کو بیٹنگ لائن کو سنبھالا اور اسکور 155تک لےجانےمیں کامیاب ہوئے۔اس موقع پر بابر اعظم 46 گیندوں پر68رنز بنا کر آؤٹ ہوگئے ، ٹام کیڈ مور 92 رنز پر آؤٹ ہوئے

کراچی کنگز کی طرف سے میر حارث،اینڈریو ٹائی،عمران طاہر اور بین کٹنگ نے ایک ایک وکٹ حاصل کی