خیبرپختونخوا کی نگراں کابینہ میں مزید 4 مشیر شامل

پشاور:  گورنر خیبرپختونخوا حاجی غلام علی نے 4 مزید مشیروں کا تقررکردیا، جس کے بعد صوبائی مشیروں کی تعداد5 ہوگئی ہے۔

نگراں وزیراعلیٰ کی سفارش پر جن 4 مشیروں کا تقرر کیاہے، اُن میں سید جعفر حسین بخاری کو بہبود آبادی ،ظفر محمود کو سیاحت وثقافت،رحمت سلام خٹک کو ابتدائی وثانوی تعلیم جب کہ ڈاکٹر عابد جمیل کو صحت کے محکمے کا قلمدان حوالے کیاگیا ہے ۔

محکمہ داخلہ اور اطلاعات کے محکمے بدستور نگراں وزیراعلیٰ اعظم خان ہی کے پاس رہیں گے ۔ آئینی طور پر نگراں وزیراعلیٰ 5 مشیروں کا تقرر کرسکتے ہیں، جن میں حمایت اللہ خان کو پہلے ہی مشیر مقرر کیاجاچکا ہے ،انہیں خزانہ و انرجی اینڈ پاور کے محکموں کے قلمدان حوالے کیے گئے ہیں۔

آئین کے مطابق کابینہ ارکان کی تعداد بشمول وزیراعلیٰ 16 ہوسکتی ہے، جن میں خوشدل خان ملک کو فارغ کرنے کے بعد ایک وزیر کو شامل کرنے کی گنجائش موجود ہے ۔