گلشن اقبال:کارسوار شہری کی فائرنگ سے 2مبینہ ڈاکو ہلاک

کراچی(اسٹاف رپورٹر) گلشن اقبال میں کارسوار شہری کی فائرنگ سے 2 مبینہ ڈکیت مارے گئے،ہلاک ملزمان کے قبضے سے 5 موبائل فونز اور موٹرسائیکل برآمد کرلی گئی

عزیز بھٹی تھانے کی حدود گلشن اقبال بلاک 10  میں  نجی سپر اسٹور کی عقبی گلی میں واقع رضا اسکوائر کے قریب فائرنگ کے واقعے میں 2 افراد کی ہلاکت کی اطلاع پرپولیس موقع پرپہنچ گئی

ایس ایچ او عدیل افضل کے مطابق فائرنگ کے نتیجے میں ہلاک ہونے والے دونوں افراد ڈکیت تھے،جوکارسوار شہری سے اس وقت لوٹ مارکررہے تھے جب شہری اپنی پارک کی گئی کار میں آکر بیٹھا تھا، اس دوران شہری نے دونوں ملزموں پر فائرنگ کی اور موقع سے چلا گیا،ایس ایچ او کے مطابق ملزمان کے قبضے سے 5 موبائل فونز اور ان کی موٹرسائیکل برآمد ہوئی

ملزموں کے قبضے سے اسلحہ نہیں ملاجس کی تلاش جاری ہے، دونوں لاشیں کارروائی کیلئے اسپتال منتقل کردی گئی ہیں،ایس ایچ او کے مطابق ہلاک ملزموں کی شناخت علی گل اور محمد اعجازکے نام سے ہوئی ہیں،تاہم پولیس اس حوالے سے مزید جھان بین کررہی ہے ۔