کراچی : اسٹیل ٹاؤن سے بوری بند مدفون اسلحہ برآمد

کراچی (امت نیوز) پولیس نے اسٹیل ٹاؤن سے ہتھیاروں سے بھرے 6 بورے برآمد کرلیے۔ جن میں 64 شاٹ گن، 14 پستول، میٹل ڈیٹیکٹر اور وائرلس بھی موجود ہیں۔ پولیس کا بتانا ہےکہ کارروائی ٹول پلازہ کے قریب کچے کے راستے پر کی گئی، ملزمان نے اسلحہ زیر زمین چھپا رکھا تھا جب کہ کارروائی کے دوران ملزمان فرار ہوگئے۔

تفصیلات کے مطابق کراچی کے علاقے اسٹیل ٹاؤن لنک روڈ کے ڈی اے لینڈ سے بھاری اسلحہ ملا ہے، برآمد ہتھیاروں میں کئی ہتھیار 31 جنوری کو چوری ہوئے تھے۔ ذرائع کا کہنا ہے کہ کھدائی کے بعد نکالے گئے بورے نئے جبکہ اسلحہ پرانا ہے، ہتھیار حلیم عادل شیخ کے بھائی کی سیکیورٹی کمپنی کے تھے۔

چوری کا مقدمہ 7 فروری کو شاہ لطیف میں درج ہوا تھا، شاہ لطیف اور اسٹیل ٹاؤن کے مقدمات میں ایک جیسے کئی نمبر موجود ہیں۔ ذرائع کے مطابق 6 بوریوں سے ملنے والا زیادہ تر اسلحہ چوری شدہ ہے، بورے سے میٹل ڈیٹکٹر اور وائر لیس سیٹ بھی ملا ہے۔ تمام برآمد شدہ ہتھیار اور دیگر سامان اسٹیل ٹاون تھانے منتقل کردیا گیا ہے۔