کراچی: مختلف علاقوں سے منشیات فروشوں۔لفٹرز سمیت27 ملزم گرفتار

کراچی( اسٹاف رپورٹر ) کراچی پولیس نے مختلف علاقوں میں مبینہ مقابلے اور چھاپہ مار کارورائیوں کے دوران منشیات فروشوں،اجرتی قاتل، موٹر سائیکل لفٹرز، ایک زخمی لٹیرے سمیت27ملزمان کو گرفتار کرلیا، قتل اور اقدام قتل کا ملزم بھی شامل ہے،قبضے سے اسلحہ ،منشیات،شراب کی بوتلیں، موٹرسائیکلیں ودیگر سامان برآمد کرنے کا دعوی۔

تفصیلات کے مطابق منگھو پیر پولیس نے منگھوپیر بروہی گوٹھ میں گزشتہ شب مبینہ پولیس مقابلے میں ایک ملزم مظفرزمان خان کو زخمی حالت میں گرفتارکرکے قبضے سے اسلحہ اور مسروقہ سامان برآمد کرلیا،جسے طبی امدا دکیلئے جناح اسپتال منتقل کیا گیا۔سہراب گوٹھ تفتیشی پولیس نے اجرتی قاتل اور اسٹریٹ کرائم کی متعدد وارداتوں میں ملوث ملزم موسیٰ کو گرفتار کر لیا،پولیس کے مطابق2 دسمبر 2022 کو مقتول جانان کو اس نے 6 لاکھ روپے اجرت لے کر قتل کیا تھا،ملزم نے انکشاف کیاکہ کلفٹن، ڈیفنس، سہراب گوٹھ،سپر ہائی وے،سچل،گلستان جوہر سمیت کراچی کے مختلف علاقوں میں اسٹریٹ کرائم کی40 سے زیادہ وارداتوں میں ملوث ہے،ملزم کے دو ساتھی نصراللہ اور حمید پہلے ہی گرفتار ہوکر جیل میں ہیں، سرجانی ٹاؤن پولیس نے ہوائی فائرنگ کرنے اور شہری کامران کو زخمی کرنے والے ملزم مزمل کو گرفتار کرکے قبضے سے فائرنگ میں استعمال ہونے والا غیر قانونی اسلحہ بمعہ ایمونیشن برآمد کرلیا۔

موٹرسائیکل لفٹنگ میں ملوث دوملزمان سلمان اورمحمد کو گرفتار کرکے اسلحہ اورتھانہ اقبال مارکیٹ کی حدود سے چوری شدہ موٹرسائیکل برآمد کرلی گئی۔منگھوپیر پولیس نے منشیات فروش شفیع کو گرفتار کرکے ایک کلو 100 گرام چرس اورنقد رقم برآمد کرلی۔ بن قاسم پولیس نے منشیا ت فروش نصیب اللہ اور اسٹریٹ کریمنل انصافی کو گرفتارکرکے ڈیڑھ کلو سے زائد چرس اوراسلحہ برآمد کر لیا۔ گارڈن، کلری،کلاکوٹ، کھارادر اور عیدگاہ پولیس نے کارروائیوں کے دوران 9 ملزمان مبشر، عدنان، عبدالرحمن، ضیاءالرحمن، گل زادہ، عبدالوہاب عرف کوڈو، عمران،عمران ماشی اور نثار احمد کوگرفتارکرکے ایک کلو گرام چرس ، 8 شراب کی بوتلیں ،2 پستول اور 3 چوری شدہ تین موٹر سائیکلیں برآمد کرلیں،جو تھانہ کھارادر، عیدگاہ اورتھانہ نیپئرکی حدود سے چوری شدہ بتائی جاتی ہیں۔ قائدآباد پولیس نے موٹرسائیکل چور عرفان کو گرفتارکرکے اسلحے کے زور پر چھینی گئی 125 موٹر سائیکل اوراسلحہ برآمد کرلیا۔

نارتھ ناظم آباد پولیس نے 5 اسٹریٹ کرمنلز ارباز خان،عدنان خان ،عارف،محمد جمیل اور عبدالوحید کو گرفتارکرکے 3 موبائل فون اور نقدی برآمد کرلی۔ گڈاپ سٹی پولیس نے ٹول پلازا کے قریب کار سے تلاشی کے دوران240 کلو چھالیہ ، 12 کلو گٹکا مین پوری برآمدکرکے ملزم علی اکبر کو گرفتارکرلیا۔سکھن پولیس نے دو گٹکا ماوا فروش ارشد اور قاسم کوگرفتار کرکے گٹکا ودیگر سامان برآمد کرلیا۔ گلستان جوہر پولیس نے گٹکا ماوا فروش شعیب کو گرفتارکرکے گٹکا ماوا برآمد کرلیا۔