مائیکروسافٹ کے بانی بل گیٹس نانا بن گئے

واشنگٹن(انٹرنیشنل ڈیسک) مائیکرو سافٹ کے بانی بل گیٹس نانا بن گئے۔ ان کی بڑی بیٹی جینیفر گیٹس کےہاں بیٹی نے جنم لیا ہے

غیر ملکی میڈیا کے مطابق مائیکرو سافٹ کے بانی بل گیٹس کی بڑی بیٹی جینیفر اور ان کے مسلم شوہر نائل نصر نے سوشل میڈیا پر خاندان میں ننھی پری کی آمد کی تصدیق کی ہے۔

اکتوبر 2021 میں شادی کرنے والےجوڑے نے سوشل میڈیا پر نومولود کی تصویر بھی شیئر کی جس میں ننھی پری کے پاؤں کو جوڑے نے اپنے ہاتھوں میں تھام رکھا ہے ۔ ابھی بچی کا نام نہیں رکھا گیا۔

سوشل میڈیا  پر بیٹی کی پیدائش کی اطلاع دینے پر مبارکبادوں کا تانتا بندھ گیا۔ اہل خانہ نے بھی تہنیتی پیغامات لکھے اور صارفین نے بھی خوشی کا اظہار کرتے ہوئے دعائیں دیں۔

خیال رہے کہ بل گیٹس اور ملینڈا گیٹس کے درمیان 2021 میں ہی طلاق ہوئی تھی۔ دونوں کی شادی 27 سال قبل ہوئی تھی۔ والدین کی طلاق کے کچھ ہی دن بعد بیٹی جینیفر اور نائل نصر کی شادی ہوئی تھی۔

بل گیٹس اور ملینڈا نے بیٹی کی شادی میں شرکت کی تھی تاہم اس کے بعد سے دونوں کو کبھی ایک ساتھ نہیں دیکھا گیا۔