کراچی میں پولیس مقابلہ : ایک ڈاکوہلاک،دوسرا زخمی حالت میں گرفتار

کراچی(اسٹاف رپورٹر)کراچی کے علاقے اورنگی ٹاؤن نمبر5 میں پولیس اور رینجرز سے مقابلے کے دوران ایک ڈاکو مارا گیا، دوسرے کو زخمی حالت میں گرفتار کرلیا گیا۔2ملزمان فرار ہوگئے

ترجمان رینجرز کے مطابق ملزمان نے اورنگی ٹاؤن نمبر 5، نشانِ حیدر چوک کے قریب کوکنگ آئل ایجنسی کے مالک سے واردات کے دوران 17 لاکھ 95 ہزار روپے کی ڈکیتی کی۔

شہریوں کی جانب سے اطلاع ملنے پر رینجرز اور پولیس موقع پر پہنچ گئی۔ ملزمان کی جانب سے رینجرز اور پولیس پر فائرنگ کی گئی، جوابی فائرنگ کے نتیجے میں ایک ملزم موقع پر جاں بحق ہو گیا جبکہ دوسرے ملزم کو زخمی حالت میں گرفتار کرلیا گیا،2 ملزمان موقع سے فرار ہوگئے

فرار ملزمان کی گرفتاری کے لیے ٹیم تشکیل دے دی گئی ہے۔ملزمان کے قبضے سے ڈکیتی میں استعمال ہونے والے3عدد پستول، 4 میگزین، 41 راؤنڈز اور17 لاکھ95 ہزار نقدی بھی برآمدکر لی گئی۔

گرفتار ملزم کو بمعہ اسلحہ، ایمونیشن اورنقدی مزید قانونی کاروائی کے لیے پولیس کے حوالے کر دیا گیا ۔