کراچی:سائٹ ایریا میں فائرنگ سے پولیس اہلکارشہید،دوسرا زخمی

کراچی(اسٹاف رپورٹر)کراچی کے علاقے سائٹ ایریا میں نامعلوم ملزمان کی فائرنگ سے ایک پولیس اہلکار شہیداور ایک زخمی ہوگیا۔
ایس ایس پی کیماڑی فدا حسین جانوری نے بتایا کہ شہید ہیڈ کانسٹیبل رمیز اور کانسٹیبل شیر افضل اسنیپ چیکنگ میں مصروف تھے۔ چار مشتبہ افراد کو دیکھ کر اہلکاروں نےانہیں رکنے کا اشارہ کیا تھا
ملزمان نے رکنے کی بجائے اندھا دھند فائرنگ کردی۔ جس سے دونوں اہلکار زخمی ہوگئے۔جن میں سے ہیڈ کانسٹبیل رمیز نے زخموں کی تاب نہ لاتے ہوئے دم توڑ دیا ۔ رمیز کی گردن میں گولیاں لگیں

ایس ایس پی کیماڑی نے بتایا کہ جائے وقوعہ سے نائن ایم ایم کے سات خول ملے ہیں ، فائرنگ کرنے والے ملزم ڈاکو تھے یا دہشت گرد یہ کہنا قبل از وقت ہوگا
وزیراعلیٰ سندھ سید مراد علی شاہ کا فائرنگ سے پولیس اہلکار کی شہادت کا نوٹس لیتے ہوئے ایڈیشنل آئی جی کراچی سے تفصیلی رپورٹ طلب کرلی۔
انہوں نے پو لیس اہلکار کے قاتلوں کو فوری گرفتار کرنے کی ہدایت بھی کی