مسلم ممالک سے مضبوط تعلقات ترجیح ہے، روس

ماسکو(انٹرنیشنل ڈیسک)روس نے کہاہے کہ اسلامی ممالک کے ساتھ مضبوط تعلقات خارجہ پالیسی کی ترجیحات میں شامل ہے

روسی وزیرخارجہ سرگئی لاروف نے اسلامک ورلڈ اسٹریٹجک ویژن گروپ کے اجلاس سے خطاب کرتے ہوئے کہا کہ روس، یوریشیا کی سب سے بڑی طاقت، اور کلچر پر مبنی ریاست ہے۔ اور ہم اسلامی دنیا کے ممالک کے ساتھ اچھے، دیانتدارانہ، باہمی احترام پر مبنی تعلقات کو خصوصی اہمیت دیتے ہیں۔ ان تعلقات کو ملکی خارجہ پالیسی کی غیر متزلزل ترجیحات میں مزید تقویت ملتی ہے

اسلامک ورلڈ اسٹریٹجک ویژن گروپ کے اجلاس میں پاکستان کی نمائندگی روس میں متعین پاکستان کے سفیر شفقت علی خان نے کی۔

سرگئی لاروف نے کہا کہ  روس مسلم ریاستوں کے دوستوں کے ساتھ مل کر اقوام متحدہ کے چارٹر کے اصولوں پر مبنی ایک زیادہ منصفانہ، جمہوری کثیر قطبی عالمی نظام کی تشکیل کے لیے کھڑا ہے،ہم مغرب کی طرف سے جارحانہ طور پر مسلط کردہ انتہائی لبرل اقدار کو مسترد کرتے ہیں،

اس موقع پر روس کی مسلم اکثریتی جمہوریہ تاتارستان کے صدر رستم منیخانوف نے خطاب میں کہا کہ مسلم ممالک کے ساتھ تعاون کو بڑھانا روسی خارجہ پالیسی کے ترجیحی شعبوں میں سے ایک ہے۔

آج اسلامی دنیا ایک منفرد تہذیبی برادری ہے جس کے اپنے مفادات، بین الاقوامی سیاست اور اسلامی معیشت عالمی ٹیکنالوجی کا سب سے اہم حصہ ہے۔ آج کے مشکل وقت میں روس اور مسلم ممالک کے درمیان تعلقات اور تعاون کو خاص اہمیت حاصل ہے

جمہوریہ تاتارستان کے صدر نے تمام اسلامی ممالک کو روس-اسلامک ورلڈ فورم میں بھی شرکت کی دعوت دی.